ઈશ્વરિયા (સણોસરા): ગોહિલવાડની સુપ્રસિદ્ધ લોકભારતી ગ્રામવિદ્યાપીઠ ખાતે સંસ્થાના પ્રણેતા, ગાંધીવિચારના પ્રણેતા, કેળવણીકાર અને સાહિત્યસર્જક મનુભાઈ પંચોળી 'દર્શક' સ્મારક વ્યાખ્યાનમાળા તેમજ પૂર્વ વિદ્યાર્થી સન્માન કાર્યક્રમનું વિશેષ આયોજન કરવામાં આવ્યું છે. સંસ્થા પરિસરમાં આગામી શનિવારે, ૨૯ ઓગસ્ટના રોજ સવારે વિદ્યાર્થીઓ અને કાર્યકર્તાઓની પ્રેરક ઉપસ્થિતિ વચ્ચે આ સમારોહ યોજાશે, જેની હાલ તીવ્ર તૈયારીઓ ચાલી રહી છે.

શ્રી મનુભાઈ પંચોળી 'દર્શક' સ્મારક વ્યાખ્યાનમાળા અંતર્ગત યોજાનાર આ ૨૩મા મણકામાં મુખ્ય વક્તા તરીકે ઉપસ્થિત રહીને જાણીતા લેખિકા અને અભ્યાસુ અધ્યાપિકા શરીફાબેન વીજળીવાળા 'સાહિત્ય અને સમાજ' વિષય પર પોતાનું વિસ્તૃત વ્યાખ્યાન રજૂ કરશે.

આ વ્યાખ્યાન સમારોહની સાથે જ લોકભારતીના પૂર્વ વિદ્યાર્થીઓના બહુમાનનો વિશેષ કાર્યક્રમ પણ સંપન્ન થશે. જેમાં પ્રાકૃતિક ખેતી અને આરોગ્ય ક્ષેત્રે ઉત્કૃષ્ટ યોગદાન આપવા બદલ મૂળજીભાઈ ભલાણી, બાળ સાહિત્ય ક્ષેત્રે વાસુદેવભાઈ સોઢા, શિક્ષણ ક્ષેત્રે બળવંતભાઈ તેજાણી તેમજ ગ્રામવિકાસ ક્ષેત્રે વિશિષ્ટ સેવાઓ આપવા બદલ જયેશભાઈ રાવળનું સન્માન કરવામાં આવશે.

આગામી શનિવારે યોજાનારા આ ગરિમાપૂર્ણ કાર્યક્રમ માટે સંસ્થા પરિવારના વડા રઘુવીરભાઈ ચૌધરી, અરુણભાઈ દવે, રાજેન્દ્રભાઈ ખીમાણી અને હસમુખભાઈ દેવમુરારિ સતત સંકલનમાં રહીને માર્ગદર્શન પૂરું પાડી રહ્યા છે. (અહેવાલ - મુકેશ પંડિત)