જૂનાગઢ તા.૨૦ : શહેરના ગણેશનગર વિસ્તારમાં વન વિભાગ દ્વારા 83 પરિવારોને જમીન ખાલી કરવાની નોટિસ પાઠવતા જ સમગ્ર વિસ્તારમાં ખળભળાટ મચી ગયો છે. નોટિસમાં જણાવવામાં આવ્યું છે કે આ પરિવારો વન જમીન પર ગેરકાયદે કબજો કરીને રહે છે. 15 દિવસમાં ઘર ખાલી નહીં કરે તો બુલડોઝરથી મકાનો તોડી પાડવામાં આવશે.

વન વિભાગના અધિકારીઓના જણાવ્યા મુજબ ગણેશનગરની જમીન રિઝર્વ ફોરેસ્ટની છે અને અહીં કોઈપણ પ્રકારનું બાંધકામ ગેરકાયદે છે. સેટેલાઇટ સર્વે અને રેકોર્ડના આધારે આ નોટિસો આપવામાં આવી છે. વિભાગનું કહેવું છે કે કોર્ટના આદેશ બાદ જ આ કાર્યવાહી શરૂ કરવામાં આવી છે.

પરંતુ સ્થાનિક લોકોનો આરોપ છે કે તેઓ છેલ્લા 40 વર્ષથી અહીં રહે છે. તેમની પાસે રેશનકાર્ડ, આધારકાર્ડ, વીજળી બિલ અને મિલકતવેરાના પુરાવા પણ છે. એક વૃદ્ધ મહિલાએ કહ્યું, "અમારા દાદા-પરદાદાના સમયથી અમે અહીં છીએ. હવે અમને કહે છે કે જમીન તમારી નથી. તો અમે ક્યાં જઈએ? અમારા છોકરાઓનું ભવિષ્ય શું?"

નોટિસ મળતા જ ગણેશનગરના લોકો રસ્તા પર ઉતરી આવ્યા હતા અને વિરોધ પ્રદર્શન કર્યું હતું. મહિલાઓ હાથમાં બાળકોને લઈને રડતી જોવા મળી હતી. "અમને ઉજાડશો નહીં" અને "વન વિભાગ હાય હાય"ના નારા લગાવવામાં આવ્યા હતા.

આ મુદ્દે રાજકારણ પણ ગરમાયું છે. ભાજપના સ્થાનિક ધારાસભ્ય અને કોંગ્રેસના નેતાઓ ગણેશનગર પહોંચીને લોકોને મળ્યા હતા. બંને પક્ષે સરકાર પાસે માંગ કરી છે કે જે પરિવારો પાસે વર્ષો જૂના પુરાવા છે તેમને વન અધિકાર કાયદા હેઠળ જમીનનો હક આપવામાં આવે. કોઈને બેઘર ન કરવામાં આવે.

કલેક્ટરે કહ્યું છે કે વન વિભાગ અને મહેસૂલ વિભાગની સંયુક્ત ટીમ પુરાવાઓની ચકાસણી કરશે. જે લોકો ખરેખર વર્ષોથી રહે છે અને તેમની પાસે દસ્તાવેજ છે તેમના કેસને માનવતાની દ્રષ્ટિએ જોવામાં આવશે. પરંતુ જેઓએ તાજેતરમાં દબાણ કર્યું છે તેમની સામે કાયદેસરની કાર્યવાહી થશે.

ગણેશનગરના લોકોએ 10 દિવસમાં નિર્ણય નહીં આવે તો ગાંધી ચિંધ્યા માર્ગે આંદોલન કરવાની ચીમકી આપી છે. હવે સરકાર આ 83 પરિવારોનું શું કરે છે એના પર સમગ્ર જૂનાગઢની નજર છે.