ગીર સોમનાથ જિલ્લાના ઉના તાલુકાના ચીખલી ગામે રહેણાક મકાનમાં પેટ્રોલના કેનમાં અચાનક બ્લાસ્ટ થતાં ભયાનક આગ ફાટી નીકળી હતી. આ દુર્ઘટનામાં એક જ પરિવારના 4 સભ્યો ગંભીર રીતે દાઝી ગયા હતા. ગઈકાલે સારવાર દરમિયાન માસૂમ બાળકનું મોત નીપજ્યું હતું, જ્યારે આજે સારવાર હેઠળ રહેલા તેના પિતા બીજલભાઈએ પણ હોસ્પિટલના બિછાને દમ તોડ્યો હતો. જ્યારે દાઝેલી હાલતમાં માતા અને પુત્રી હાલ ભાવનગર હોસ્પિટલમાં જીવન-મરણ વચ્ચે ઝોલા ખાઈ રહ્યાં છે. પિતા-પુત્રના એકસાથે મોતના પગલે સમગ્ર ચીખલી ગામમાં માતમ છવાઈ ગયો છે.