( પ્રવિણ વ્યાસ દ્વારા ) મોરબી : યુનાઇટેડ ફોરમ ઑફ બેંક યુનિયન્સ (UFBU) દ્વારા 28 થી 30 સપ્ટેમ્બર દરમિયાન 3 દિવસીય દેશવ્યાપી હડતાળનું એલાન આપવામાં આવ્યું છે. આ હડતાળમાં મોરબી જિલ્લાની 12 રાષ્ટ્રીયકૃત અને ગ્રામીણ બેંકોના 500 થી વધુ કર્મચારીઓ જોડાશે, જેના પગલે સોમવારથી બુધવાર સુધી બેંકિંગ કામકાજ પ્રભાવિત થશે.
    હડતાળ પૂર્વે 26 સપ્ટેમ્બરે ચોથો શનિવાર હોવાથી રજા રહેશે. સતત પાંચ દિવસ સુધી બેંકિંગ સેવાઓ ઠપ ન થાય અને ગ્રાહકોને મુશ્કેલી ન પડે તે માટે RBI દ્વારા 27 સપ્ટેમ્બર (રવિવાર)ના રોજ તમામ રાષ્ટ્રીયકૃત અને પ્રાદેશિક ગ્રામીણ બેંક શાખાઓ, એટીએમ-લિન્ક્ડ ઓફિસો અને કરન્સી ચેસ્ટ્સ રાબેતા મુજબ ચાલુ રાખવાનો નિર્ણય લેવામાં આવ્યો છે.
અઠવાડિયામાં 5 દિવસ કામકાજ લાગુ કરવાની લાંબા સમયથી ચાલી રહેલી માંગણીના સમર્થનમાં આ હડતાળનું આયોજન કરવામાં આવ્યું છે.
પ્રભાવિત સેવાઓ: 28 થી 30 સપ્ટેમ્બર દરમિયાન બેંક શાખાઓમાં રોકડ વ્યવહાર, ચેક ક્લિયરિંગ અને દસ્તાવેજી કામગીરી બંધ રહેશે.
ચાલુ સેવાઓ: ATM, UPI, ઇન્ટરનેટ બેંકિંગ અને મોબાઇલ બેંકિંગ જેવી ડિજિટલ સેવાઓ રાબેતા મુજબ કાર્યરત રહેશે