મુન્દ્રામાં ૬ વર્ષની બાળકી પર દુષ્કર્મ આચરનારને અંતિમશ્વાસ સુધી કેદ ફટકારતી ભુજ કોર્ટ
મા બાપ કામે ગયા હતા ત્યારે ૬ વર્ષની બાળકીને લાલચ આપીને મનીષ ગનોૈરી મંડલે દુષ્કર્મ આચર્યું હતું
(વિનોદ ગાલા દ્વારા) ભુજ, તા.૨૨: કચ્છના મુંદરાના ભદ્રેશ્વર વિસ્તારમાં ૬ વર્ષની સગીર બાળકીને લાલચ આપીને અપહરણ કર્યા બાદ તેની સાથે દુષ્કર્મ આચરી ગંભીર ઈજાઓ પહોંચાડવાના ચર્ચાસ્પદ કેસમાં ભુજ કચ્છની નામદાર સ્પેશયલ કોર્ટે આરોપીને કડકમાં કડક સજા ફટકારી છે.કોર્ટે આરોપીને અંતિમશ્વાસ સુધીની સખત કેદની સજા અને કુલ રૂ. ૧,૫૦,૦૦૦ (દોઢ લાખ) નો દંડ ફટકાર્યો છે. આ કેસની વિગતે વાત કરીએ તો ગત તા. ૧૨/૦૧/૨૦૨૬ ના રોજ મુંદરા નજીક લેબર કોલોનીમાં રહેતા ફરિયાદી દંપતી સવારના સમયે મજુરી કામ અર્થે ગયા હતા.તે સમયે ઘરે એકલી રહેલી તેમની ૬ વર્ષની બાળકીને લાલચ આપીને આરોપી મનીષકુમાર ગનૌરી મંડલ (ઉ.વ. ૨૬, મૂળ રહે. બિહાર, હાલ રહે. લેબર કોલોની, ભદ્રેશ્વર) અપહરણ કરી ગયો હતો.રહેણાંક વિસ્તાર પાછળ બાવળોની ઝાડીમાં લઈ જઈ નરાધમે બાળકી સાથે બળજબરીથી દુષ્કર્મ આચરી તેને શારીરિક તથા માનસિક રીતે ગંભીર ઈજાઓ પહોંચાડી હતી.આ અંગે મુંદરા મરીન પોલીસ સ્ટેશનમાં ગુનો નોંધાતા તપાસનીસ અધિકારી એચ.એસ.ત્રિવેદી (પોલીસ ઇન્સ્પેક્ટર) દ્વારા જરૂરી પુરાવા એકત્ર કરી કોર્ટમાં ચાર્જશીટ રજૂ કરવામાં આવી હતી.આ કેસ ભુજ કચ્છના નામદાર સ્પેશયલ જજ એમ.એફ.ખત્રીની અદાલતમાં ચાલવા પર આવ્યો હતો.જેમાં પ્રોસીકયુશન તરફે મુખ્ય જિલ્લા સરકારી વકીલ એચ.બી.જાડેજા અને કાયદા સહાયક એડવોકેટ માલશ્રી ગઢવી હાજર રહ્યા હતા.સરકારી વકીલે રજૂ કરેલા ૩૪ દસ્તાવેજી પુરાવા અને ૧૩ સાક્ષીઓની જુબાનીના આધારે કોર્ટે આરોપીને તકસીરવાન ઠેરવી બી.એન.એસ.અને પોક્સો એક્ટની વિવિધ કલમો હેઠળ આરોપીને અંતિમશ્વાસ સુધીની સખત કેદ અને કુલ રૂ. ૧,૫૦,૦૦૦ નો દંડ જ્યારે બી.એન.એસ. કલમ ૧૩૭(૨): ૭ વર્ષની સખત કેદ અને રૂ. ૧૦,૦૦૦ દંડ ફટકાર્યો છે.આ ઉપરાંત નામદાર કોર્ટે ભોગ બનનાર બાળકીને રૂ. ૩,૦૦,૦૦૦ (ત્રણ લાખ) નું વળતર ચૂકવવા માટે ડી.એલ.એસ.એ. ( DLSA) ને ભલામણ કરવાનો હુકમ કર્યો છે તથા આરોપી દ્વારા ભરવામાં આવનાર દંડની રકમ પણ બાળકીને ચૂકવવા આદેશ કર્યો હતો.
(10:50 AM IST)
છેલ્લા 8 દિવસમાં સૌથી લોકપ્રિય 
