તા. ૨૦ નવેમ્બર ર૦ર૬ વિક્રમ સંવત ર૦૮૩ કારતક સુદ – ૧૧ શુક્રવાર
News of Saturday, 21st November 2026
દેવભૂમિ દ્વારકા જિલ્લાના 21 નિર્જન ટાપુઓ પર પ્રવેશ પ્રતિબંધ: નરારા ટાપુને શરતોને આધીન મુક્તિ
જિલ્લા અધિક જિલ્લા મેજિસ્ટ્રેટ દ્વારા બહાર પાડવામાં આવેલા જાહેરનામા મુજબ જિલ્લાના 21 નિર્જન ટાપુઓ પર સક્ષમ અધિકારીની પૂર્વ મંજૂરી વિના પ્રવેશવા પર સંપૂર્ણ પ્રતિબંધ મૂકી દેવાયો

દેવભૂમિ દ્વારકા જિલ્લાના ખંભાળિયા ખાતેથી અધિક જિલ્લા મેજિસ્ટ્રેટ દ્વારા જાહેરનામું પ્રસિદ્ધ કરવામાં આવ્યું છે.દરિયાઈ સરહદ અને ટાપુઓની સંવેદનશીલ ભૌગોલિક પરિસ્થિતિને ધ્યાને રાખી આ સુરક્ષા વ્યવસ્થા ગોઠવવામાં આવી છે.નિર્જન ટાપુઓ પર દેશવિરોધી તત્વો ગેરકાયદેસર પ્રવૃત્તિઓ ન આચરે તે માટે પૂરતી તકેદારી રાખવી અનિવાર્ય બની હતી.કોઈ રાષ્ટ્રવિરોધી સંગઠનો કે અસામાજિક તત્વો ત્યાં આશરો ન મેળવે તે માટે પ્રશાસને સતર્કતા દાખવી છે.ટાપુઓનો ઉપયોગ દાણચોરી કરવા માટે ન થાય તે બાબતને પ્રાથમિકતા આપવામાં આવી છે.આ ઉપરાંત અસામાજિક તત્વો દ્વારા હથિયારો છુપાવવાની આશંકાઓને ધ્યાનમાં રાખીને પણ આ પગલું લેવાયું છે.રાષ્ટ્રીય સુરક્ષા અને જાહેર શાંતિ જોખમાય નહીં તેવા હેતુથી આ સમગ્ર જાહેરનામું લાગુ કરાયું છે.
દેવભૂમિ દ્વારકા જિલ્લા વહીવટી તંત્રના કાર્યક્ષેત્ર હેઠળ કુલ 24 ટાપુઓ આવેલા છે.આ તમામ ટાપુઓમાંથી ૨૧ ટાપુઓ સંપૂર્ણપણે નિર્જન હોવાથી ત્યાં માનવ વસવાટ જોવા મળતો નથી.નિર્જન સ્થળોનો દુરુપયોગ રોકવા આ પ્રતિબંધિત આદેશોનું કડક પાલન કરાવવાનું નક્કી કરવામાં આવ્યું છે.જોકે જિલ્લાના કુલ ટાપુઓ પૈકી માનવ વસતી ધરાવતા બે ટાપુઓને આ જાહેરનામાના પ્રતિબંધમાંથી મુક્તિ આપવામાં આવી છે.આ ઉપરાંત પ્રવાસન તેમજ ઔદ્યોગિક મહત્વ ધરાવતા નરારા ટાપુને પણ નિયત શરતોને આધીન રાખીને મુક્તિ અપાઈ છે.નરારા ટાપુ પર શરતોના આધારે જ અવરજવર ચાલુ રાખવાની મંજૂરી તંત્ર દ્વારા આપવામાં આવી છે.બાકીના તમામ 21 નિર્જન ટાપુઓ પર સામાન્ય નાગરિકો કે અન્ય કોઈ પણ વ્યક્તિ મંજૂરી વગર જઈ શકશે નહીં.
(12:42 AM IST)









છેલ્લા 8 દિવસમાં સૌથી લોકપ્રિય 
