જૂનાગઢના પ્રખ્યાત યાત્રાધામ ગિરનાર ખાતે આવતા શ્રદ્ધાળુઓ અને પ્રવાસીઓ માટે એક મહત્વના સમાચાર સામે આવ્યા છે. એશિયાના સૌથી મોટા ગિરનાર રોપ-વેની સેવા આગામી દિવસોમાં 2 જૂનથી 10 જૂન સુધી બંધ રહેશે.  

ગિરનાર રોપ-વેનું સંચાલન કરતી કંપની દ્વારા તેના વાર્ષિક ટેકનિકલ મેન્ટેનન્સ માટે એક મોટો અને મહત્વનો નિર્ણય લેવામાં આવ્યો છે. આ અંતર્ગત આગામી ૨ જૂનથી ૧૦ જૂન સુધી રોપ-વે સેવા સંપૂર્ણપણે બંધ રાખવામાં આવશે. યાત્રિકોની સુરક્ષા અને સુવિધાને સર્વોચ્ચ અગ્રિમતા આપીને આ સુધારાત્મક કામગીરી હાથ ધરવામાં આવી રહી છે. રોપ-વેની તમામ ટેકનિકલ ચકાસણી અને મેન્ટેનન્સની કામગીરી પૂર્ણ થયા બાદ આગામી ૧૧ જૂનથી રોપ-વે સેવા ફરી નિયમિત રીતે શરૂ કરી દેવામાં આવશે.

મેન્ટેનન્સના આ સમયગાળા દરમિયાન રોપ-વેની તમામ કેબિન અને ટ્રોલીઓનું બારીકાઈથી ચેકિંગ કરવામાં આવશે, જેથી ભવિષ્યમાં કોઈ ટેકનિકલ ખામી ન સર્જાય. તંત્ર દ્વારા ગિરનાર આવતા તમામ પ્રવાસીઓ અને શ્રદ્ધાળુઓને ખાસ અપીલ કરવામાં આવી છે કે તેઓ આ દિવસો દરમિયાન પોતાની યાત્રાનું આયોજન એ પ્રમાણે કરે જેથી તેમને કોઈ મુશ્કેલીનો સામનો ન કરવો પડે.