હવામાન વિભાગ દ્વારા વ્યક્ત કરવામાં આવેલી ભારે વરસાદની આગાહીને પગલે જૂનાગઢના માંગરોળના દરિયામાં ભારે કરંટ જોવા મળી રહ્યો છે. દરિયામાં 5 થી 7 ફૂટ ઊંચા આકાશી મોજા ઉછળતા હોવાના કારણે પરિસ્થિતિ ગંભીર બની છે, જેના પગલે માંગરોળ બંદર પર 3 નંબરનું ભયજનક સિગ્નલ લગાવી દેવામાં આવ્યું છે. તંત્ર દ્વારા સલામતીના ભાગરૂપે તમામ ફિશિંગ બોટોને દરિયાકિનારે સુરક્ષિત રીતે લંગારી દેવામાં આવી છે. આ સાથે જ માછીમારોને દરિયો ન ખેડવા અને પ્રવાસીઓને દરિયાકિનારે ન જવાની સખત સૂચના આપીને સમગ્ર વહીવટી તંત્રને એલર્ટ મોડ પર મૂકી દેવાયું છે.