જૂનાગઢ જિલ્લામાં છેલ્લા ચોવીસ કલાકથી વરસી રહેલા આકાશી આફતે સમગ્ર પંથકને ધમરોળી નાખ્યો છે. જિલ્લામાં મેઘરાજાએ એવું રૌદ્ર સ્વરૂપ ધારણ કર્યું છે કે સર્વત્ર જળબંબોળની સ્થિતિ સર્જાઈ છે. અનરાધાર અને ભારે વરસાદને કારણે જૂનાગઢના અંદાજે 22 જેટલા ગ્રામ્ય વિસ્તારોનો અન્ય વિસ્તારો સાથેનો સંપર્ક તૂટી ગયો છે. રસ્તાઓ પર પાણી ફરી વળતા અને પુલ ધોવાઈ જતાં આ ગામો સંપૂર્ણપણે સંપર્ક વિહોણા બન્યા છે, જેના કારણે સ્થાનિક વહીવટી તંત્રની ચિંતામાં મોટો વધારો થયો છે.

જિલ્લાના મુખ્ય તાલુકા મથકો એવા માંગરોળ, માણાવદર અને કેશોદ પંથકમાં મેઘરાજાએ ભારે તાંડવ મચાવ્યું છે. આ ત્રણેય તાલુકાઓમાં નીચાણવાળા વિસ્તારો અને રહેણાંક સોસાયટીઓમાં પૂરના પાણી ઘૂસી ગયા છે. અચાનક આવેલા પૂરના કારણે સ્થાનિક જનજીવન ખરાબ રીતે પ્રભાવિત થયું છે. લોકોના ઘરોમાં અને વેપારીઓની દુકાનોમાં પાણી ભરાઈ જવાથી મોટા પાયે નુકસાન થવાની ભીતિ સેવાઈ રહી છે. વાહનવ્યવહાર અને વીજ પુરવઠો પણ ખોરવાઈ જતાં લોકો મુશ્કેલીમાં મુકાયા છે.

જૂનાગઢનો નીચાણવાળો ગણાતો ઘેડ પંથક ફરી એકવાર કુદરતી આફતનો ભોગ બન્યો છે. ઉપરવાસમાંથી નદીઓમાં આવેલા પાણી અને સ્થાનિક ધોધમાર વરસાદને કારણે ઘેડ પંથકના અનેક ગામડાઓ પાણીના દરિયા વચ્ચે ઘેરાઈ ગયા છે અને ટાપુમાં ફેરવાઈ ગયા છે. ખેતરો જાણે મોટા તળાવ બન્યા હોય તેવા દ્રશ્યો સર્જાયા છે, જેને કારણે તૈયાર મોલ ધોવાઈ જવાની ચિંતામાં ખેડૂતો ગરકાવ થઈ ગયા છે. સંપર્ક વિહોણા બનેલા ગામોમાં રાહત અને બચાવ કામગીરી શરૂ કરવા માટે તંત્ર દ્વારા યુદ્ધના ધોરણે પગલાં લેવામાં આવી રહ્યા છે.