પ્રવીણ વ્યાસ દ્વારા, મોરબી: મોરબીના જેતપર ગામે ખેડૂતોની વિવિધ પડતર માંગણીઓને લઈને ચાલી રહેલા આંદોલનમાં એક નવો વળાંક આવ્યો છે. ખેડૂતોની રજૂઆતો અને લાંબી લડત બાદ આખરે સરકાર દ્વારા ખાનગી વીજ કંપનીના વીજપોલના વળતર બાબતે નવી નીતિનો લેખિત પરિપત્ર કરી દેવામાં આવ્યો છે. આ પરિપત્રની નકલ સોશિયલ મીડિયામાં વાયરલ થતાં આંદોલનકારી ખેડૂતો સુધી પણ પહોંચી ગઈ છે. જોકે, આંદોલન સમિતિના સભ્યોનું કહેવું છે કે હજુ સુધી આ પરિપત્રનો સત્તાવાર અને ઊંડાણપૂર્વક અભ્યાસ કરવાનો બાકી છે, જેથી તમામ ખેડૂતો સાથે વિસ્તૃત ચર્ચા કર્યા બાદ જ આગામી સમયમાં આંદોલન અંગેનો અંતિમ નિર્ણય સમિતિ દ્વારા જાહેર કરવામાં આવશે.

૧૮ દિવસથી ભૂખ્યા પેટે બેઠેલા અન્નદાતા, છ માંગણીઓ મુદ્દે મક્કમ લડત:

જેતપર ગામે છેલ્લા ૧૮ દિવસથી ખેડૂતો દ્વારા પોતાની પડતર માંગણીઓ સંતોષવા માટે આમરણાંત ઉપવાસ આંદોલન ચલાવવામાં આવી રહ્યું છે. ખેડૂતોના ખેતરોમાં જે ખાનગી વીજ કંપનીના વીજ પોલ અને ટાવર ઊભા કરવામાં આવી રહ્યા છે, તેની સામે જમીન અને પાક નુકસાનીનું પૂરતું તેમજ ન્યાયી વળતર આપવામાં આવે તેવી મુખ્ય માંગ છે. ખેડૂતો દ્વારા પોતાની આવી જ કુલ છ જેટલી મહત્વની માંગણીઓ અગાઉ લેખિત સ્વરૂપે સરકાર સમક્ષ રજૂ કરવામાં આવી હતી.

મૌખિક જાહેરાત બાદ આખરે લેખિત જીઆર (GR) બહાર પડ્યો:

સરકારે આ છ માંગણીઓના પ્રતિભાવમાં થોડા દિવસો પહેલાં વળતરની એક નવી કલ્યાણકારી નીતિ બનાવીને તેની મૌખિક જાહેરાત કરી હતી. પરંતુ આંદોલન પર બેઠેલા ખેડૂતો કોઈ પણ પ્રકારની મૌખિક વાત માનવા તૈયાર ન હતા અને જ્યાં સુધી સત્તાવાર લેખિત પરિપત્ર ન મળે ત્યાં સુધી આંદોલન સમેટવાનો ધરાર ઇનકાર કરી દીધો હતો. ખેડૂતોની આ મક્કમતાને પગલે આખરે ગઈકાલે રાજ્ય સરકારના ઊર્જા વિભાગ દ્વારા નવી નીતિને લગતો સત્તાવાર પરિપત્ર જાહેર કરી દેવામાં આવ્યો છે.

લોકડાયરાના કારણે અભ્યાસ બાકી, અધિકારીઓએ પત્ર આપ્યો નથી:

આ સરકારી પત્ર બાબતે જેતપર ખાતે આંદોલન કરી રહેલા ખેડૂતો અને સમિતિના સભ્યો સાથે વાતચીત કરતાં તેમણે જણાવ્યું હતું કે, ગઈકાલે રાત્રે આંદોલન છાવણી ખાતે એક ભવ્ય લોકડાયરાનું આયોજન કરવામાં આવ્યું હતું. આ લોકડાયરો મોડી રાત સુધી ચાલ્યો હોવાના કારણે તેઓ આ પરિપત્રની વિગતોનો ઝીણવટભરી રીતે અભ્યાસ કરી શક્યા નથી. વધુમાં તેમણે ઉમેર્યું કે, આ પરિપત્ર તેઓને સોશિયલ મીડિયાના માધ્યમથી મળ્યો છે, પરંતુ તંત્રના કોઈ જવાબદાર અધિકારી દ્વારા હજુ સુધી આ પત્ર સત્તાવાર રીતે આંદોલનકારીઓ સુધી રૂબરૂ પહોંચાડવામાં આવ્યો નથી. હવે આ પત્રની એક-એક કંડિકાનો સંપૂર્ણ અભ્યાસ કર્યા બાદ જ આગળનું કદમ ઉઠાવવામાં આવશે.

ગામોગામથી ઉમટતો જનમેદનીનો ટેકો, વહેલી તકે નિવેડો લાવવા માંગ:

બીજી તરફ, આ ખેડૂત આંદોલનને આસપાસના ગામોગામથી પ્રચંડ સમર્થન મળી રહ્યું છે. દરરોજ મોટી સંખ્યામાં અન્ય ગામોના ખેડૂતો અને અગ્રણીઓ જેતપર છાવણીની મુલાકાત લઈ રહ્યા છે અને તન, મન તથા ધનથી આ આંદોલનને મજબૂત કરવાની ખાતરી આપી રહ્યા છે. છેલ્લા ૧૮ દિવસથી અન્નદાતા અન્નનો એક પણ દાણો લીધા વિના ભૂખ્યા પેટે ન્યાયની રાહ જોઈને બેઠા છે, ત્યારે સરકાર અને સંબંધિત ખાનગી વીજ કંપની માનવતાવાદી અભિગમ અપનાવીને વહેલી તકે આ ગંભીર આંદોલનનો સુખદ નિવેડો લાવે તેવી ઉગ્ર લાગણી સમગ્ર પંથકની જનતા અને સ્થાનિક સંગઠનો દ્વારા વ્યક્ત કરવામાં આવી રહી છે.