રાજકોટ તા.૧૮ : ૧૨ મા વિશ્વ યોગ દિવસ નિમિત્તે -- માઁ ચામુંડાની પાવન તીર્થભૂમિ તથા રાષ્ટ્રીય શાયર ઝવેરચંદ મેઘાણીની જન્મભૂમિ  ચોટીલા (જિ. સુરેન્દ્રનગર) સ્થિત જે. વી. એચ. દોશી પ્રાથમિક શાળા / એન. એન. શાહ માધ્યમિક અને ઉચ્ચતર માધ્યમિક શાળા (મનહર પાર્કની આગળ, જૂની રેલવે લાઈનની પાસે) ખાતે – 20 અને 21 જૂનના રોજ  -- વિના મૂલ્યે બે-દિવસીય યોગ શિબિર યોજાશે. આ વર્ષની વૈશ્વિક ઊજવણીના કેન્દ્રસ્થાને ‘Yoga for Healthy Ageing’ – ‘સ્વસ્થ વૃધ્ધત્વ માટે યોગ’ છે.

ઝવેરચંદ મેઘાણીના પૌત્ર પિનાકી નાનકભાઈ મેઘાણી સ્થાપિત ઝવેરચંદ મેઘાણી સ્મૃતિ સંસ્થાન તથા શ્રી ચોટીલા એજ્યુકેશન એન્ડ ચેરિટેબલ ટ્રસ્ટ દ્વારા આ પ્રેરક આયોજન કરાયું છે. ચોટીલા નાયબ કલેકટરની કચેરી, મામલતદારની કચેરી, તાલુકા પંચાયત અને નગરપાલિકા તેમજ ગુજરાત સરકારના રમતગમત, યુવા અને સાંસ્કૃતિક પ્રવૃત્તિઓ વિભાગના રાષ્ટ્રીય શાયર ઝવેરચંદ મેઘાણી જન્મસ્થળ તથા સંગ્રહાલય અને રાષ્ટ્રીય શાયર ઝવેરચંદ મેઘાણી સરકારી તાલુકા પુસ્તકાલય પણ સાથે જોડાશે. ગુજરાત રાજ્યના નાયબ મુખ્યમંત્રી હર્ષભાઈ સંઘવીએ આ યોગ શિબિર માટે શુભેચ્છાઓ પાઠવી છે.

છેલ્લા 35 વર્ષથી નવી પેઢીમાં યોગના સાત્વિક અને સચોટ પ્રચાર-પ્રસાર માટે સવિશેષ કાર્યરત અમદાવાદ સ્થિત ખ્યાતિ પ્રાપ્ત સેવાભાવી યોગ ગુરુ અતુલભાઈ ભટ્ટ પ્રત્યક્ષ માર્ગદર્શન આપશે. અમેરિકા સ્થિત ઝવેરચંદ મેઘાણીના પૌત્રી અને Geriatricsના નિષ્ણાંત તબીબ ડૉ. શેણી મેઘાણી MD, MPH પણ ઓન-લાઈન જોડાશે.

20 જૂન (શનિવાર)ના રોજ સવારે 07 કલાકે માત્ર બાળકો માટે ‘Yoga for Kids’નું આયોજન કરવામાં આવ્યું છે. સાંજે 05 કલાકે માત્ર વરિષ્ઠ નાગરિકો માટે ‘Therapeutic Yoga’ના આયોજનમાં શરીરના અંગો તેમજ સાંધાનો દુ:ખાવો, સંધિવા, કબજિયાત-ગેસ-એસિડિટી, ડાયાબિટીસ, બ્લડ પ્રેશર, હ્રદય, કિડની, લીવર, થાઈરોઈડ, પ્રોસ્ટેટ, મેદસ્વિતા, અનિંદ્રા, માનસિક તણાવ-ડિપ્રેશન જેવી સમસ્યાઓમાં યોગ, પ્રાણાયામ અને ધ્યાન દ્વારા રાહત અંગે માર્ગદર્શન આપવામાં આવશે. વિશ્વ યોગ દિવસ અવસરે - 21 જૂન (રવિવાર)ના રોજ સવારે 07 કલાકે બાળકો, યુવાનો અને વરિષ્ઠ નાગરિકો માટે વિશેષ આયોજન કરવામાં આવ્યું છે.  

ભારતના યશસ્વી પ્રધાનમંત્રી અને ગુજરાતના પનોતા પુત્ર નરેન્દ્રભાઈ મોદીએ 27 સપ્ટેમ્બર 2014ના રોજ સંયુક્ત રાષ્ટ્રસંઘની મહાસભામાં એમના સંબોધનમાં 21 જૂનને વિશ્વભરમાં આંતરરાષ્ટ્રીય યોગ દિવસ તરીકે ઉજવવામાં આવે તેવો પ્રેરક વિચાર મૂક્યો હતો. સંયુક્ત રાષ્ટ્રસંઘે આ પ્રસ્તાવને 177 દેશોના સમર્થન સાથે મંજૂરી આપી હતી. 21 જૂન 2015ના રોજ શરૂ થયેલ આંતરરાષ્ટ્રીય યોગ દિવસ આજે વિશ્વના 190થી વધુ દેશોમાં ઉજવાય છે. 21 જૂનની તારીખ પસંદ કરવાનું કારણ એ હતું કે આ દિવસ ઉત્તર ગોળાર્ધમાં વર્ષનો સૌથી લાંબો દિવસ છે. હિંદુ શાસ્ત્રો અનુસાર આદિયોગી શિવે આ દિવસે સપ્તર્ષિઓને યોગનો પહેલો ઉપદેશ આપ્યો હતો.

       વધુ વિગત માટે પિનાકી નાનકભાઈ મેઘાણી (મો. 9825021279) તથા કિરીટસિંહ રહેવર - મામા (મો. 9426972178)નો સંપર્ક કરી શકાશે.

(-આલેખન : પિનાકી નાનકભાઈ મેઘાણી-ઝવેરચંદ મેઘાણી સ્મૃતિ સંસ્થાન-મો.9825021279)