અમરેલી જિલ્લાના ખાંભા શહેરમાં મોડી રાત્રે એક સિંહ રહેણાંક વિસ્તારમાં પ્રવેશી જતાં સ્થાનિક લોકોમાં ભયનો માહોલ સર્જાયો છે. ખાંભાના મહાદેવપરા વિસ્તારમાં શિકારની શોધમાં આવેલા સિંહના આંટાફેરાના દ્રશ્યો CCTV કેમેરામાં સ્પષ્ટપણે કેદ થયા છે. આ ઘટનાનો વીડિયો સોશિયલ મીડિયા પર ઝડપથી વાયરલ થઈ રહ્યો છે.

રહેણાંક વિસ્તારમાં સિંહને જોઈને શ્વાન અને અન્ય પશુઓમાં દોડધામ મચી ગઈ હતી. નિર્ભય રીતે રસ્તા પર ફરતા સિંહના આ દ્રશ્યોએ સ્થાનિક રહીશો માટે ચિંતાનો વિષય ઊભો કર્યો છે. ગુજરાતના ગીર અને આસપાસના વિસ્તારોમાં સિંહોની હાજરી જાણીતી છે, પરંતુ માનવ વસાહતમાં તેમની અવરજવર લોકોની સુરક્ષા અંગે ગંભીર સવાલો ઊભા કરે છે.

આખરે જંગલનો રાજા શહેરના રહેણાંક વિસ્તારમાં શા માટે પહોંચ્યો? શું તે શિકારની શોધમાં માનવ વસાહત તરફ આવી રહ્યો છે? આવા પ્રશ્નો પર સ્થાનિકોમાં ચર્ચા ચાલી રહી છે. આ ઘટના બાદ વન્યજીવ સુરક્ષા અને સાવચેતી અંગે વધુ જાગૃતિ લાવવાની જરૂરિયાત જણાઈ રહી છે.