ટીંબી, ભાવનગર : ભાવનગર જિલ્લાના ઉમરાળા તાલુકાના ટીંબી ગામે આવેલી અને નિ:શુલ્ક આરોગ્ય સેવાઓ માટે જાણીતી સ્વામી શ્રી નિર્દોષાનંદજી માનવસેવા હોસ્પિટલને મુંબઈના એક દાતા પરિવાર દ્વારા આર્થિક સહયોગ પ્રાપ્ત થયો છે. હોસ્પિટલ દ્વારા ચલાવવામાં આવતી નિ:શુલ્ક સેવાકીય પ્રવૃત્તિઓથી પ્રભાવિત થઈને મુંબઈના મધુકંતા ગુણવંત શેઠ ચેરિટેબલ ટ્રસ્ટ (MGS ટ્રસ્ટ) દ્વારા હોસ્પિટલમાં નવા યુરોલોજી વિભાગના ડેવલપમેન્ટ માટે કુલ 1 કરોડ 15 લાખ રૂપિયા જેવી માતબર રકમનું અનુદાન જાહેર કરવામાં આવ્યું છે.

 એડવાન્સ અનુદાનની રકમ અર્પણ કરાઈ:

આ સેવાકાર્ય માટે મુંબઈના મુખ્ય ટ્રસ્ટીઓ શ્રી દીપકભાઈ શેઠ, શ્રી નિકુંજભાઈ શાહ તથા શ્રી યશભાઈ પારેખે હોસ્પિટલના ટ્રસ્ટી શ્રી બી એલ રાજપરાનો સામેથી સંપર્ક કરીને આ સહાયની સંમતિ દર્શાવી હતી. જે અંતર્ગત તારીખ 24 એપ્રિલ 2026 ના રોજ પ્રથમ હપ્તા તરીકે 46 લાખ રૂપિયાની રકમ એડવાન્સ અનુદાન સ્વરૂપે પ્રાપ્ત થઈ છે. હોસ્પિટલના ટ્રસ્ટી મંડળ દ્વારા આ ઉમદા કાર્ય બદલ દાતાઓનો હૃદયપૂર્વક આભાર વ્યક્ત કરવામાં આવ્યો છે.

 ટ્રસ્ટીઓની હોસ્પિટલ મુલાકાત:

તાજેતરમાં MGS ટ્રસ્ટના ટ્રસ્ટીઓએ હોસ્પિટલની શુભેચ્છા મુલાકાત લીધી હતી. આ પ્રસંગે હોસ્પિટલના ટ્રસ્ટી શ્રી ખીમજીભાઈ દેવાણી તથા શ્રી બી એલ રાજપરાએ તેમનું ઉષ્માભર્યું સ્વાગત અને સન્માન કર્યું હતું. મુલાકાત દરમિયાન દાતાઓને હોસ્પિટલના વિવિધ વિભાગો અને ત્યાં ચાલતી નિ:શુલ્ક સેવાકીય પ્રવૃત્તિઓથી સંપૂર્ણ માહિતગાર કરવામાં આવ્યા હતા. હોસ્પિટલનું મેનેજમેન્ટ અને દર્દીઓ પ્રત્યેની સેવાની ભાવના પ્રત્યક્ષ નિહાળીને ટ્રસ્ટીઓ ખૂબ જ પ્રભાવિત થયા હતા.

આ નવા યુરોલોજી વિભાગના નિર્માણથી આસપાસના વિસ્તારના જરૂરિયાતમંદ દર્દીઓને ઘરઆંગણે જ અત્યાધુનિક અને નિ:શુલ્ક સારવાર ઉપલબ્ધ થશે, જે સમગ્ર પંથક માટે આશીર્વાદરૂપ સાબિત થશે. (અહેવાલ - મુકેશ પંડિત)