ઈશ્વરિયા : ભાવનગર જિલ્લાના જાણીતા પત્રકાર અને તસવીરકાર મૂકેશ પંડિત દ્વારા એક નવી શૈક્ષણિક અને માહિતીસભર પહેલના ભાગરૂપે ‘આલેખન ગુજરાત’ સાપ્તાહિક પ્રકાશનનો વિધિવત પ્રારંભ કરવામાં આવ્યો છે. જેઠ સુદ બીજ એટલે કે જેઠી બીજનાં મહિમાવંત અને પવિત્ર દિવસે મંગળવારે ઈશ્વરિયા ગામ ખાતે એક સાદા અને ગરિમાપૂર્ણ ઉપક્રમ સાથે આ સાપ્તાહિક પ્રકાશન ખુલ્લું મૂકવામાં આવ્યું હતું. આ પ્રસંગે તંત્રી મૂકેશ પંડિતના વડીલ બંધુ નરેશભાઈ પંડિતના વરદહસ્તે ‘આલેખન ગુજરાત’ ના પ્રથમ અંકનું વિમોચન કરવામાં આવ્યું હતું. પ્રકાશનના પ્રારંભે અંકની સફળતા માટે પ્રથમ પ્રત નીલકંઠ મહાદેવના ચરણે ધરીને આશીર્વાદ મેળવવામાં આવ્યા હતા.

‘આલેખન ગુજરાત’ સાપ્તાહિક પ્રકાશનના આ મંગળ પ્રારંભ બદલ ઈશ્વરિયા ગામ સહિત સમગ્ર પંથકના ધાર્મિક, સામાજિક અને રાજકીય ક્ષેત્રના અગ્રણીઓ, વરિષ્ઠ પત્રકારો તેમજ ગ્રામજનો, મિત્રો અને શુભચિંતકો દ્વારા તંત્રી અને તેમની ટીમને વ્યાપક પ્રમાણમાં અભિનંદન સહ શુભકામનાઓ પાઠવવામાં આવી રહી છે. આ નવું સાપ્તાહિક આગામી સમયમાં લોકપ્રશ્નો અને પ્રાદેશિક અહેવાલોને વાચા આપવામાં મહત્વનું માધ્યમ બનશે તેવી આશા વ્યક્ત કરવામાં આવી છે.