(મુકુંદ બદિયાણી દ્વારા)જામનગર તા.૨૬ :  જામનગર જિલ્લાના સિક્કા નગરપાલિકા વિસ્તારમાં રવિવારે વહેલી સવારથી જ લોકશાહીના પર્વનો ઉત્સાહ જોવા મળ્યો છે. સિક્કા માધ્યમિક શાળા ખાતેના મતદાન મથક પર સવારથી જ યુવાઓથી લઈને વૃદ્ધો મતદાન કરવા પહોંચી રહ્યા છે.

સિક્કા નગરપાલિકાની ચૂંટણી માટે વોર્ડ નં. 1 થી 7 માં કુલ 28 બેઠકો માટે 80 ઉમેદવારો મેદાનમાં છે. આ વિસ્તારમાં કુલ 19,409 મતદારો નોંધાયેલા છે. મતદાન મથકો પર સવારથી જ મતદારોની લાંબી કતારો જોવા મળી હતી.

મતદાન કરવા આવેલા 80 વર્ષના મુક્તાબેને જણાવ્યું કે, “હું વહેલી સવારે જ મતદાન કરવા આવી છું. ‘પહેલા મતદાન પછી અન્ય કામ’ એ સૂત્રને અનુસરીને તમામ લોકો, ખાસ કરીને મારી ઉંમરના વડીલોએ અચૂક મત આપવા જવું જોઈએ.”

મુક્તાબેનના આ જુસ્સાને જોઈને બૂથ પર ઉપસ્થિત યુવા મતદારોમાં પણ ઉત્સાહ વધ્યો હતો. સિક્કામાં શાંતિપૂર્ણ માહોલમાં મતદાન પ્રક્રિયા ચાલી રહી છે. તંત્ર દ્વારા વૃદ્ધો અને દિવ્યાંગો માટે ખાસ વ્યવસ્થા કરવામાં આવી છે.