માધાપર, કચ્છ તા.૩૦ કચ્છ જિલ્લાના માધાપર ગામ ખાતે આવેલા લગભગ 400 વર્ષ જૂના અને ઐતિહાસિક મહત્વ ધરાવતા 'જગાવારું' તળાવની હાલત અત્યંત દયનીય બની ગઈ છે. ગામના ગટરના ગંદા પાણી સીધા તળાવમાં ઠલવાતા હોવાથી એક સમયનું સ્વચ્છ જળાશય આજે ગંદકીનું ઘર બની ગયું છે. દુર્ગંધ અને મચ્છરોના ઉપદ્રવથી આજુબાજુના વિસ્તારમાં રહેતા 500થી વધુ પરિવારોનું જીવન મુશ્કેલ બન્યું છે.

સ્થાનિકોના જણાવ્યા મુજબ, માધાપર ગામની ગટર વ્યવસ્થા ખોરવાઈ જવાના કારણે છેલ્લા 8 મહિનાથી ગટરનું દૂષિત પાણી સીધું જગાવારું તળાવમાં છોડવામાં આવી રહ્યું છે. પરિણામે તળાવનું પાણી કાળું અને દુર્ગંધયુક્ત બની ગયું છે. પ્લાસ્ટિક, કચરો અને ગંદકીના ઢગલાથી તળાવ પટ ભરાઈ ગયો છે. ચોમાસા પહેલા તળાવ ઉંડું કરવાની અને સફાઈની કામગીરી પણ હજુ સુધી શરૂ કરવામાં આવી નથી.

જગાવારું તળાવ કાંઠે રહેતા રમેશભાઈ આહિરે જણાવ્યું, "આ તળાવ અમારા પૂર્વજોની અમાનત છે. પહેલા આખું ગામ અહીંનું પાણી પીતું હતું. આજે પરિસ્થિતિ એવી છે કે દુર્ગંધના કારણે ઘરમાં બેસવું પણ મુશ્કેલ છે. બાળકો સતત બીમાર પડી રહ્યા છે. મચ્છરોનો એટલો ત્રાસ છે કે રાત્રે ઊંઘવું અશક્ય બન્યું છે."

આ મામલે ગ્રામજનોએ અનેક વખત માધાપર ગ્રામ પંચાયત અને ભુજ તાલુકા પંચાયતમાં રજૂઆતો કરી છે, પરંતુ હજુ સુધી કોઈ નક્કર કાર્યવાહી થઈ નથી. ગ્રામ પંચાયતનું કહેવું છે કે ગટર લાઈન રીપેર કરવાની જવાબદારી તાલુકા પંચાયતની છે, જ્યારે તાલુકા પંચાયત ગ્રાન્ટના અભાવનું બહાનું ધરી રહી છે

'જગાવારું' તળાવ માધાપર ગામની ઓળખ છે. લગભગ 400 વર્ષ પહેલા ગામના વડીલો દ્વારા આ તળાવનું નિર્માણ કરવામાં આવ્યું હતું. આ તળાવમાંથી જ આખા ગામને પીવાનું પાણી મળતું હતું. અનેક લોકવાર્તાઓ અને સાંસ્કૃતિક કાર્યક્રમો આ તળાવ સાથે જોડાયેલા છે. આજે તંત્રની બેદરકારીના કારણે આ ઐતિહાસિક વારસો નષ્ટ થવાના આરે આવીને ઉભો છે.

ગ્રામજનોએ ચીમકી આપી છે કે જો 15 દિવસમાં તળાવની સફાઈ અને ગટરના પાણીને ડાયવર્ટ કરવાની કામગીરી શરૂ નહીં થાય તો તેઓ કલેક્ટર કચેરીનો ઘેરાવ કરશે.