રાજકોટ તા. ૮: ગોંડલમાં રહેતાં અને ઇમિટેશનની મજુરી કરતાં યુવાને વ્‍યાજખોરીમાં ફસાઇ જતાં ફિનાઇલ અને એસિડ પી આપઘાતનો પ્રયાસ કરતાં સારવાર માટે રાજકોટ ખસેડાયો છે. તેના કહેવા મુજબ પૈસાની જરૂર હોઇ પરિચીત પાસેથી ૧૪ હજાર થોડા દિવસ માટે લીધા હતાં. હવે આ શખ્‍સ દર બે કલાકનું વ્‍યાજ ચડાવતં હોઇ કંટાળીને પગલુ ભર્યુ હતું.

જાણવા મળ્‍યા મુજબ ગોંડલમાં દોમડીયા સોસાયટીમાં રહેતાં પ્રદિપભાઇ ભરતભાઇ સાકરીયા (ઉ.વ.૩૨) નામના યુવાને સાંજે ફિનાઇલ તેમજ એસિડ ભેળા કરીને પી લેતાં ગોંડલ સારવાર અપાવી રાજકોટ સિવિલ હોસ્‍પિટલમાં ખસેડાતાં હોસ્‍પિટલ ચોકીના સ્‍ટાફે ગોંડલ એ-ડિવીઝન પોલીસને જાણ કરી હતી.

પ્રદિપભાઇના કહેવા મુજબ તે બે ભાઇમાં મોટો અને અપરિણીત છે. છુટક ઇમિટેશનનું કામ કરી ગુજરાન ચલાવે છે. તેને પૈસાની જરૂર હોઇ ગોંડલમાં જ રહેતાં પરિચીત શખ્‍સ પાસેથી થોડા દિવસ પહેલા ૧૪ હજાર વ્‍યાજે લીધા હતાં. પણ હવે આ શખ્‍સ આકરી ઉઘરાણી કરી દર બે કલાકે વ્‍યાજ ચડશે તેમ કહી તત્‍કાળ પૈસા આપી દેવા દબાણ કરતો હોઇ કંટાળી જતાં આ પગલુ ભર્યુ હતું. પોલીસે ખરેખર શું બન્‍યું? તે જાણવા વધુ તપાસ હાથ ધરી છે.