ભુજ, તા.૧૧: કચ્છની ધરતી પર વન અને વન્યજીવ સંરક્ષણના ક્ષેત્રમાં એક પછી એક સોનાની સુરજ ઊગી રહ્યા છે. રાજસ્થાનથી લાવવામાં આવેલા નર બાળ ઘોરાડના ઉછેરમાં કચ્છ વન વિભાગને બીજી વખત મળેલી અદ્ભુત સફળતા બાદ હવે આ ખુશીઓમાં ચાર ચાંદ લાગવા જઈ રહ્યા છે. બાળ ઘોરાડના બચ્ચાએ આકાશમાં ઉડાન ભરવાની શરૂઆત કરી છે ત્યારે આ ઐતિહાસિક ક્ષણના સાક્ષી બનવા માટે ભારત સરકારના કેન્દ્રીય વન અને પર્યાવરણ મંત્રી ભૂપેન્દ્ર યાદવ આગામી ૧૩ અને ૧૪ સપ્ટેમ્બરે બે દિવસીય કચ્છના પ્રવાસે આવી રહ્યા છે. તેમના આ પ્રવાસથી કચ્છમાં વન્યજીવ પ્રવાસન અને સંવર્ધનના કાર્યોને વધુ વેગ મળશે.

કચ્છના મુખ્ય વન સંરક્ષક ડો. ધીરજ મિત્તલ અને નાયબ વન સંરક્ષક હર્ષ ઠક્કરે વિગતો આપતા જણાવ્યું છે કે કેન્દ્રીય મંત્રી ૧૩ સપ્ટેમ્બરે સવારે ભુજ ખાતે 'ચેરિયાં' વિષયક વિશેષ સેમિનારમાં ભાગ લેશે. ત્યારબાદ, પ્રવાસના બીજા દિવસે એટલે કે ૧૪ સપ્ટેમ્બરે તેઓ સીધા અબડાસા સ્થિત ઘોરાડ અભયારણ્યની મુલાકાતે જશે, જ્યાં તેઓ સફળતાપૂર્વક ઉછરેલા નર બાળ ઘોરાડનું પ્રત્યક્ષ નિરીક્ષણ કરશે. આ ઉપરાંત, મંત્રી નલિયા ખાતે ઘોરાડના ઈંડાં અને બચ્ચાંના વૈજ્ઞાનિક સંવર્ધન માટે અત્યાધુનિક સુવિધાઓથી સજ્જ 'સોફ્ટ ટીનેજ સેન્ટર'નું ભવ્ય ઉદ્ઘાટન પણ કરશે. એક બચ્ચાના સફળ ઉછેર બાદ હવે ભવિષ્યમાં વધુ ઈંડાં લાવીને આ અત્યંત વિલુપ્ત થઈ રહેલા પક્ષીની સંખ્યા વધારવાનું ભગીરથ આયોજન હાથ ધરવામાં આવ્યું છે.

આ પ્રવાસનો સૌથી રોમાંચક અને મોટો મુદ્દો બન્ની ઘાસિયા મેદાનનો છે. વન વિભાગના સૂત્રોના જણાવ્યા અનુસાર, આગામી સમયમાં વડાપ્રધાન નરેન્દ્ર મોદીના હસ્તે કચ્છના પ્રખ્યાત બન્ની વિસ્તારમાં ચિત્તાઓને ખુલ્લા મૂકવાના મહત્વાકાંક્ષી પ્રોજેક્ટને આકાર આપવામાં આવી રહ્યો છે. આ પ્રોજેક્ટ અંતર્ગત સ્થાનિક કક્ષાએ ચાલી રહેલી તમામ તૈયારીઓ અને સુરક્ષા વ્યવસ્થાઓની આખરી સમીક્ષા કરવા માટે પણ કેન્દ્રીય મંત્રી ખાસ ઉપસ્થિત રહેવાના છે. મંત્રીની આ મુલાકાતથી કચ્છ માત્ર રાષ્ટ્રીય જ નહીં, પરંતુ વૈશ્વિક વન્યજીવ નકશા પર વધુ મજબૂતીથી અંકિત થવા તરફ આગળ વધી રહ્યું છે.