ભાવનગરના મહુવા તાલુકાના માળિયા ગામે આયોજિત કોળી સમાજના સમૂહલગ્ન પ્રસંગમાં ભાજપના દિગ્ગજ નેતા અને ધારાસભ્ય પરસોત્તમભાઈ સોલંકીના કડક નિવેદને રાજકીય આલમમાં ચર્ચાઓ જગાવી છે. તેમણે સાર્વજનિક મંચ પરથી જ પોતાની પાર્ટીના મહુવાના ધારાસભ્ય શિવાભાઈ ગોહિલની આકરી ઝાટકણી કાઢી હતી. પરસોત્તમભાઈ સોલંકીએ ધારાસભ્યની ગેરહાજરી અંગે પ્રશ્ન ઉઠાવતા કહ્યું હતું કે, "શિવાભાઇ ક્યાં ગયા? આવા મોટા સામાજિક પ્રસંગમાં તો હાજરી આપવી જોઈએ." આ પ્રકારના જાહેરમાં અપાયેલા ઠપકાને કારણે સ્થાનિક રાજકારણમાં ગરમાવો જોવા મળી રહ્યો છે અને કાર્યકરોમાં પણ અચરજની લાગણી ફેલાઈ છે.

પરસોત્તમ સોલંકીએ વધુમાં કટાક્ષ કરતા ધારાસભ્યના વર્તન પર આકરા પ્રહારો કર્યા હતા. તેમણે મંચ પરથી જણાવ્યું કે, "તમને જેમણે જીતાડ્યા છે તેમને ભૂલી જાવ તો તમારા જેવો માણસ નથી. ચૂંટણી આવે એટલે તમે મારા બંગલાની વાટ જોઈને બેસી રહો છો, પણ જીત્યા પછી લોકો વચ્ચે દેખાતા નથી." આ નિવેદને સ્પષ્ટ કર્યું છે કે વરિષ્ઠ નેતૃત્વ અને સ્થાનિક ધારાસભ્ય વચ્ચે સંકલનનો અભાવ વર્તાઈ રહ્યો છે.

સમાજની સેવા અને આર્થિક પાસાઓ પર પ્રહાર કરતા સોલંકીએ ધારાસભ્યની મિલકત અને કમાણી તરફ ઈશારો કરતા ગંભીર આરોપો મૂક્યા હતા. તેમણે જાહેરમાં કહ્યું હતું કે, "બહુ કમાયા છો, બધું ક્યાં છુપાયું છે એ અમને ખબર છે." એક તરફ રાજ્યમાં સ્થાનિક સ્વરાજ્યની ચૂંટણીઓનો માહોલ છે, ત્યારે ભાજપના બે કદાવર નેતાઓ વચ્ચેની આ આંતરિક ખેંચતાણ વિરોધ પક્ષો માટે પણ ચર્ચાનો વિષય બની છે. આ કાર્યક્રમ બાદ હવે જોવાનું એ રહેશે કે શિવાભાઇ ગોહિલ આ મામલે શું સ્પષ્ટતા કરે છે.