શું ટીમ ઈન્ડિયા ઈતિહાસ બદલશે?ઃ કાલથી ચોથો ટેસ્ટ
ઓલ્ડટ્રેફોર્ડનું મેદાન પણ આપણા માટે અનલકીઃ ૧૮ વર્ષથી ઈંગ્લેન્ડમાં ટેસ્ટ સિરીઝ જીતવાની રાહ... : જુના રેકોર્ડ મુજબ ભારત સિરીઝમાં પાછળ હોય ત્યારે ક્યારેય પણ સિરીઝ જીતી શકી નથી, સિરીઝ ડ્રો પણ કરી શક્યા નથી
નવી દિલ્હીઃ ટીમ ઈન્ડિયા છેલ્લા ૧૮ વર્ષથી ઈંગ્લેન્ડમાં ટેસ્ટ સીરીઝ જીતવાની રાહ જોઈ રહી છે. ટીમ ઈન્ડિયાએ ૨૦૦૭માં રાહુલ દ્રવિડની કેપ્ટનશીપમાં આ સિદ્ધિ મેળવી હતી, પરંતુ ત્યારથી ભારતને આ પ્રવાસમાં ફક્ત હારનો સામનો કરવો પડ્યો છે. હવે ફરી એકવાર ભારતીય ટીમ સીરીઝમાં પાછળ છે અને હવે તેની પાસે સીરીઝની છેલ્લી બે મેચ બાકી છે. શું ટીમ ઈન્ડિયા આ બે મેચમાં વાપસી કરીને પોતાની રાહનો અંત લાવી શકશે? ભારતીય ક્રિકેટનો ૯૦ વર્ષનો ઇતિહાસ આપણને કહે છે કે આ વખતે પણ આ સ્વપ્ન પૂર્ણ થશે નહીં.
આ ઈંગ્લેન્ડ પ્રવાસ પર નવા કેપ્ટન શુભમન ગિલના નેતૃત્વમાં એક યુવાન અને બિનઅનુભવી ભારતીય ટીમ આવી હતી. આવી સ્થિતિમાં, શરૂઆતથી જ ટીમ ઈન્ડિયા પાસેથી બહુ અપેક્ષાઓ નહોતી. પરંતુ સીરીઝની પહેલી મેચમાં ટીમ ઈન્ડિયાએ જે પ્રકારનું મજબૂત પ્રદર્શન આપ્યું તેનાથી બધાને આﾍર્ય થયું. ભારતીય ટીમે એજબેસ્ટન મેદાન પર પણ જીત મેળવી હતી, જ્યાં તેણે પહેલાં ક્યારેય ટેસ્ટ મેચ જીતી ન હતી. પરંતુ પછી લોર્ડ્સમાં વિજયની નજીક પહોંચ્યા પછી ભારત હારી ગયું.
લોર્ડ્સ ટેસ્ટમાં હાર સાથે, ટીમ ઇન્ડિયા ૫ મેચની સીરીઝમાં ૧-૨ થી પાછળ પડી ગઈ. આ સ્કોરલાઇન ટીમ ઇન્ડિયા માટે સારી નથી કારણ કે ઇતિહાસ ભારતીય ટીમના પક્ષમાં નથી. જૂની શ્રેણીના રેકોર્ડ દર્શાવે છે કે જ્યારે પણ ભારતીય ટીમ સીરીઝમાં ૧-૨ થી પાછળ રહી છે, ત્યારે તે ક્યારેય તે સીરીઝ જીતી શકી નથી. જીતની વાત તો ભૂલી જાવ, ભારતીય ટીમ આ સ્કોરલાઇન પછી સીરીઝ ડ્રો પણ કરી શકી નથી.
આજ સુધી, ક્રિકેટના ઇતિહાસમાં ફક્ત ૩ વાર એવું બન્યું છે કે જ્યારે ૫ ટેસ્ટ મેચની સીરીઝની ત્રીજી મેચ સુધી ૨-૧ અથવા ૧-૦ થી પાછળ રહેલી ટીમે શ્રેણી જીતી હોય. સૌ પ્રથમ, ૧૯૩૬ માં, ઓસ્ટ્રેલિયાએ ૧-૨ થી પાછળ રહ્યા બાદ ઇંગ્લેન્ડ સામે સીરીઝ જીતી હતી. પછી ૧૯૯૨-૯૩ માં, વેસ્ટ ઇન્ડીઝે ૦-૧ રનથી પાછળ રહ્યા બાદ સીરીઝ જીતી હતી. તેવી જ રીતે, ઇંગ્લેન્ડે ૧૯૯૮ માં ૦-૧ થી પાછળ રહ્યા બાદ દક્ષિણ આફ્રિકાને હરાવ્યું હતું.
આનો અર્થ એ થયો કે ટીમ ઈન્ડિયાનો રેકોર્ડ તેના પક્ષમાં નથી. આવી સ્થિતિમાં, તેણે ઇતિહાસ બદલવો પડશે. ટીમ ઈન્ડિયા માટે આ પડકાર બમણો થાય છે કારણ કે ચોથી ટેસ્ટ મેચ માન્ચેસ્ટરમાં રમવાની છે અને ટીમ ઈન્ડિયા આજ સુધી અહીં જીતી શકી નથી. ભારતે ઓલ્ડ ટ્રેફોર્ડ મેદાન પર કુલ ૯ ટેસ્ટ મેચ રમી છે, જેમાંથી તે ૪ હારી ગયું છે, જ્યારે ૫ ડ્રો રહી છે. તેથી, જો ટીમ ઈન્ડિયાનું સ્વપ્ન ફરી એકવાર પૂર્ણ ન થાય તો નવાઈ નહીં લાગે
(2:33 PM IST)
છેલ્લા 8 દિવસમાં સૌથી લોકપ્રિય 
