એશિયા કપ ૨૦૨૫માં ભારત-પાકિસ્તાનની મેચ હંમેશની જેમ ચર્ચાનો વિષય રહી. આ હાઈ-વોલ્ટેજ મુકાબલામાં ભારતે પાકિસ્તાનને ૭ વિકેટે હરાવીને શાનદાર જીત મેળવી. એક તરફ ભારતીય ખેલાડીઓના પ્રદર્શનની ચર્ચા થઈ રહી હતી, તો બીજી તરફ, પાકિસ્તાની ટીમની નવી જર્સીએ પણ લોકોનું ધ્યાન ખેંચ્યું.
 
પાકિસ્તાનની નવી જર્સીનો રહસ્ય
મેચ દરમિયાન, ઘણા ક્રિકેટ ચાહકોએ નોંધ્યું કે પાકિસ્તાની ખેલાડીઓની જર્સી પર નંબરની નીચે ઉર્દૂમાં કંઈક લખેલું હતું. આ નવો ફેરફાર જોઈને લોકોમાં ઉત્સુકતા જાગી કે આ પાછળનું કારણ શું છે અને તેમાં શું લખેલું છે?

તપાસ કરતાં જાણવા મળ્યું કે પાકિસ્તાન ક્રિકેટ બોર્ડ (PCB) એ તાજેતરમાં ટીમની જર્સીમાં ફેરફાર કર્યો છે. નવી ડિઝાઇનમાં ખેલાડીઓના નંબરની નીચે ઉર્દૂ ભાષામાં “પાકિસ્તાન” લખેલું છે. આ ફેરફારનો મુખ્ય ઉદ્દેશ્ય ટીમની રાષ્ટ્રીય ઓળખ અને સાંસ્કૃતિક જોડાણને મજબૂત બનાવવાનો છે. પહેલાં જર્સીમાં માત્ર અંગ્રેજીમાં નામ અને નંબર હતા, પરંતુ આ વખતે ઉર્દૂને પણ સ્થાન મળ્યું છે.
 
મેચનું પરિણામ
મેચની વાત કરીએ તો, પાકિસ્તાને ટોસ જીતીને પ્રથમ બેટિંગ કરવાનો નિર્ણય લીધો હતો, જે તેમના માટે નુકસાનકારક સાબિત થયો. ભારતીય બોલરોએ પાકિસ્તાની બેટ્સમેનોને દબાણમાં રાખ્યા. ભારત તરફથી કુલદીપ યાદવે ૩ વિકેટ અને અક્ષર પટેલે ૨ વિકેટ લઈને પાકિસ્તાનને ૨૦ ઓવરમાં માત્ર ૧૨૭ રન પર જ અટકાવી દીધું. જવાબમાં, ભારતીય બેટ્સમેનોએ સરળતાથી ૧૫.૫ ઓવરમાં આ લક્ષ્ય હાંસલ કરી લીધું.

જ્યાં મેચ ભારતના નામે રહી, ત્યાં પાકિસ્તાનની આ નવી જર્સી સોશિયલ મીડિયા પર ઘણી ચર્ચામાં રહી અને પાકિસ્તાની ચાહકોએ આ પગલાની ખૂબ પ્રશંસા કરી.