સિડની: ઓસ્ટ્રેલિયા સામે સિડનીમાં રમાઈ રહેલી ત્રીજી અને અંતિમ વનડે મેચમાં ટીમ ઈન્ડિયાના યુવા ફાસ્ટ બોલર હર્ષિત રાણા એ પોતાના પ્રદર્શનથી બધાને સ્તબ્ધ કરી દીધા છે. સતત ટીકાનો સામનો કરી રહેલા રાણાએ કાંગારૂઓ સામે 'સિંહની જેમ' ગર્જના કરી અને ચાર વિકેટ ઝડપીને ઓસ્ટ્રેલિયાની બેટિંગ લાઇન-અપને ૨૩૬ રનમાં સમેટી લેવામાં મહત્ત્વની ભૂમિકા ભજવી.
૨૩ વર્ષીય હર્ષિત રાણાને પ્લેઇંગ ઇલેવનમાંથી બહાર કરીને અન્ય બોલરને તક આપવાની માંગ ઉઠી રહી હતી. જોકે, રાણાએ સિડની ક્રિકેટ ગ્રાઉન્ડ પર ૮.૪ ઓવરમાં માત્ર ૩૯ રન આપીને ૪ વિકેટ લઈને તેના ટીકાકારોને બોલથી જડબાતોડ જવાબ આપ્યો છે. આ તેની ODI કારકિર્દીનો સર્વશ્રેષ્ઠ બોલિંગ આંકડો પણ છે.
રાણાએ જે ચાર મુખ્ય ઓસ્ટ્રેલિયન બેટ્સમેનોને આઉટ કર્યા તેમાં એલેક્સ કેરી (૨૪ રન), મિશેલ ઓવેન (૧ રન), જોશ હેઝલવુડ (૦ રન) અને કૂપર કોનોલી (૨૩ રન) નો સમાવેશ થાય છે.
છેલ્લી કેટલીક મેચોમાં નબળા પ્રદર્શનને કારણે હર્ષિત રાણાની સાથે સાથે મુખ્ય કોચ ગૌતમ ગંભીરને પણ નિશાન બનાવવામાં આવી રહ્યા હતા, જેમણે રાણામાં વિશ્વાસ જાળવી રાખ્યો હતો.
રાણા ગંભીરની અપેક્ષાઓ પર ખરા ઉતર્યા છે. તેમણે એડિલેડ વનડેમાં પણ બેટ (૧૮ બોલમાં અણનમ ૨૪) અને બોલ (૨ વિકેટ) બંનેથી પ્રભાવશાળી પ્રદર્શન કર્યું હતું.

રાણાની ઘાતક બોલિંગને કારણે, ભારતીય ટીમને ઓસ્ટ્રેલિયાએ જીતવા માટે ૫૦ ઓવરમાં ૨૩૭ રનનો લક્ષ્યાંક આપ્યો છે.