મુંબઈ: રિલાયન્સ ઇન્ડસ્ટ્રીઝ નિયંત્રિત જીઓસ્ટારે ઊંડા નાણાકીય નુકસાનને ટાંકીને ૨૦૨૭ સુધીના ભારતીય ક્રિકેટ પ્રસારણ અધિકારોના કરારમાંથી બહાર નીકળવાની જાહેરાત કરી છે. 

આઇસીસીએ ૨.૪ બિલિયન ડોલરની માંગ સાથે નવા ભાગીદારની શોધ શરૂ કરી છે, પરંતુ સોની, નેટફ્લિક્સ અને એમેઝોન સહિતના મોટા ખેલાડીઓએ ઊંચી કિંમતોને કારણે રસ દર્શાવ્યો નથી.

ઇન્ટરનેશનલ ક્રિકેટ કાઉન્સિલ (આઇસીસી) ૨૦૨૬ના આઇસીસી મેન્સ ટી૨૦ વર્લ્ડ કપ પહેલા મીડિયા-અધિકાર સંકટનો સામનો કરી રહ્યું છે. રિલાયન્સ ઇન્ડસ્ટ્રીઝ નિયંત્રિત જીઓસ્ટારે બાકીના બે વર્ષના ભારતીય પ્રસારણ અધિકારોના કરારમાંથી બહાર નીકળવા માટે આઇસીસીને ઔપચારિક રીતે જાણ કરી છે. કંપનીએ આનું કારણ ઊંડા નાણાકીય નુકસાન આપ્યું છે. જીઓસ્ટારનો વર્તમાન ૨૦૨૪-૨૭ ચક્રનો કરાર $૩ બિલિયન (₹૨૭૦૦૦ કરોડથી વધુ) મૂલ્યનો હતો.

કરારમાંથી બહાર નીકળવાના સંકેત સાથે, આઇસીસીએ ૨૦૨૬-૨૯ માટે ભારતીય અધિકારો માટે $૨.૪ બિલિયન ડોલર (લગભગ ₹૨૨૦૦૦ કરોડ) માંગતા નવા વેચાણ પ્રક્રિયા શરૂ કરી દીધી છે. આઇસીસીએ સોની પિક્ચર, નેટફ્લિક્સ અને એમેઝોન પ્રાઇમ વીડિયોનો સંપર્ક કર્યો છે, પરંતુ કિંમતના ઉંચા આંકડાને કારણે કોઈએ પણ નક્કર રસ દર્શાવ્યો નથી.

સ્પોર્ટ્સ કોન્ટ્રાક્ટ્સ પર અપેક્ષિત નુકસાન માટે જીઓસ્ટારની જોગવાઈઓ એક વર્ષમાં ₹૧૨૩૧૯ કરોડથી બમણા કરતાં વધુ વધીને ₹૨૫૭૬૦ કરોડ થઈ ગઈ છે, જે લાંબા ગાળાના સ્પોર્ટ્સ ડીલ્સમાંથી ઓછું વળતર મળવાના દબાણને દર્શાવે છે.