નવી દિલ્હી : સૈયદ મુશ્તાક અલી ટ્રોફી (SMAT) ૨૦૨૫ માં બરોડાના વિકેટકીપર-બેટ્સમેન અમિત પાસીએ સર્વિસિસ સામેના પોતાના T20 ડેબ્યૂ મેચમાં સનસનાટીભર્યું પ્રદર્શન કરીને ક્રિકેટ જગતમાં હલચલ મચાવી દીધી છે. ૨૬ વર્ષીય પાસીએ માત્ર ૫૫ બોલમાં ૧૦ ચોગ્ગા અને ૯ ગગનચુંબી છગ્ગાની મદદથી ૧૧૪ રનની વિસ્ફોટક ઇનિંગ્સ રમીને T20 ડેબ્યૂમાં સૌથી વધુ વ્યક્તિગત સ્કોરનો વિશ્વ રેકોર્ડ સરભર કર્યો છે.
આ શાનદાર સદી સાથે, અમિત પાસીએ પાકિસ્તાનના બિલાલ આસિફના દાયકા જૂના રેકોર્ડની બરાબરી કરી, જેમણે ૨૦૧૫માં સિયાલકોટ સ્ટેલિયન્સ માટે ૧૧૪ રન બનાવ્યા હતા. આટલું જ નહીં, પાસી T20 ડેબ્યૂમાં સદી ફટકારનાર ત્રીજા ભારતીય બેટ્સમેન બન્યા છે.
બરોડાનો પહાડ જેવો સ્કોર: પહેલા બેટિંગ કરતા બરોડાની ટીમે નિર્ધારિત ૨૦ ઓવરમાં ૨૨૦ રનનો જંગી સ્કોર બનાવ્યો. આ સ્કોરમાં એકલા અમિત પાસીનો ફાળો ૧૧૪ રનનો હતો, જ્યારે બીજા ક્રમે સૌથી વધુ રન બનાવનાર ભાનુ પુનિયા માત્ર ૨૮ રન બનાવી શક્યા હતા.
સર્વિસિસની નિષ્ફળતા: ૨૨૧ રનના વિશાળ લક્ષ્યાંકનો પીછો કરતા સર્વિસિસની ટીમ ૨૦ ઓવરમાં ૮ વિકેટે માત્ર ૨૦૭ રન જ બનાવી શકી. સર્વિસિસ તરફથી કુંવર પાઠક અને રવિ ચૌહાણે ૫૧-૫૧ રન બનાવીને લડત આપી, પરંતુ ટીમના ૬ બેટ્સમેન બે આંકડાનો સ્કોર પણ બનાવી શક્યા નહોતા.
આમ, અમિત પાસીની અવિસ્મરણીય ડેબ્યૂ સદીને કારણે બરોડાએ સર્વિસિસને ૧૩ રનથી હરાવીને ટ્રોફીમાં વિજયી શરૂઆત કરી છે.