દુબઈ  : દુબઈના આઈસીસી એકેડેમી ગ્રાઉન્ડ પર રમાયેલી રોમાંચક સેમિફાઇનલ મેચમાં ભારતીય અંડર-19 ટીમે શ્રીલંકાને ધૂળ ચટાડીને એશિયા કપની ફાઇનલમાં પ્રવેશ કરી લીધો છે. હવે રવિવારે ખિતાબી મુકાબલામાં ભારતનો સામનો કટ્ટર હરીફ પાકિસ્તાન સામે થશે. શુક્રવારે રમાયેલી મેચમાં વરસાદને કારણે રમત 20-20 ઓવરની કરવામાં આવી હતી, જેમાં ભારતે તમામ મોરચે શાનદાર પ્રદર્શન કર્યું હતું.
બોલરોનો પાયમાલ અને શ્રીલંકાની શરણાગતિ
ટોસ હારીને પ્રથમ બેટિંગ કરવા ઉતરેલી શ્રીલંકાની ટીમ ભારતીય બોલરો સામે લાચાર દેખાઈ હતી. કનિષ્ક ચૌહાણ અને હેનિલ પટેલની ધારદાર બોલિંગ (બંનેની 2-2 વિકેટ) સામે શ્રીલંકા 20 ઓવરમાં 8 વિકેટે માત્ર 138 રન જ બનાવી શક્યું હતું. શ્રીલંકા તરફથી ચામિકાએ સૌથી વધુ 42 રન કર્યા હતા, પરંતુ ભારતીય શિસ્તબદ્ધ બોલિંગ સામે લંકાના બેટ્સમેનો લાંબી ભાગીદારી કરી શક્યા નહોતા.
વિહાન અને એરોનની 'મેરેથોન' ભાગીદારી
139 રનના લક્ષ્યાંકનો પીછો કરવા ઉતરેલી ભારતીય ટીમની શરૂઆત નબળી રહી હતી. ઓપનર વૈભવ સૂર્યવંશી (9) અને આયુષ મ્હાત્રે (7) સસ્તામાં આઉટ થઈ ગયા હતા. જોકે, ત્યારબાદ વિહાન મલ્હોત્રા (61* રન) અને એરોન જ્યોર્જ (58* રન) એ બાજી સંભાળી હતી. બંને વચ્ચે ત્રીજી વિકેટ માટે 114 રનની અણનમ ભાગીદારી નોંધાઈ હતી, જેના કારણે ભારતે 18મી ઓવરમાં જ જીત હાંસલ કરી લીધી હતી.
રવિવારે 'મધર ઓફ ઓલ બેટલ્સ'
બીજી તરફ પાકિસ્તાને પણ બાંગ્લાદેશને 8 વિકેટે હરાવી ફાઈનલમાં જગ્યા બનાવી છે. વર્ષ 2025 ભારત માટે પાકિસ્તાન સામે શાનદાર રહ્યું છે. આ વર્ષે બંને દેશો વચ્ચે રમાયેલી 7 મેચોમાંથી ભારતે 6 માં જીત મેળવી છે. ખાસ વાત એ છે કે, આ જ ટુર્નામેન્ટના લીગ સ્ટેજમાં પણ ભારતે પાકિસ્તાનને 90 રનથી હરાવ્યું હતું. હવે જોવાનું એ રહેશે કે રવિવારે ટીમ ઈન્ડિયા આ જીતનો સિલસિલો જાળવી રાખીને એશિયા કપની ટ્રોફી પોતાના નામે કરી શકે છે કે નહીં.