રાંચી: મહિલા હોકીના ચાહકો જેની આતુરતાથી રાહ જોઈ રહ્યા હતા, તે 'મહિલા હીરો હોકી ઇન્ડિયા લીગ (HIL) ૨૦૨૫-૨૬' સીઝનનો ગઈકાલે ભવ્ય પ્રારંભ થયો હતો. રાંચીના ઐતિહાસિક મારંગ ગોમકે જયપાલ સિંહ મુંડા એસ્ટ્રો ટર્ફ સ્ટેડિયમ ખાતે રમાયેલી પ્રથમ મેચમાં SG પાઇપર્સે શાનદાર રમતનું પ્રદર્શન કરી રાંચી રોયલ્સને ૨-૦થી પરાજય આપ્યો હતો.
કેપ્ટન નવનીતે નોંધાવ્યો સીઝનનો પ્રથમ ગોલ
મેચની શરૂઆતથી જ બંને ટીમો વચ્ચે કાંટાની ટક્કર જોવા મળી હતી. રાંચી રોયલ્સને પ્રથમ પેનલ્ટી કોર્નર મળ્યો હતો, પરંતુ મારિયા ઓર્ટીઝના ડ્રેગફ્લિકને વિરોધી ટીમના ગોલકીપરે કુશળતાપૂર્વક બચાવી લીધો હતો. જોકે, ૨૭મી મિનિટે SG પાઇપર્સને સફળતા મળી હતી. ટીમના કેપ્ટન નવનીત કૌરે પેનલ્ટી કોર્નરને શક્તિશાળી શોટ સાથે ગોલમાં ફેરવીને ચાલુ સીઝનનો સૌપ્રથમ ગોલ નોંધાવ્યો હતો અને પોતાની ટીમને ૧-૦ની લીડ અપાવી હતી.
ટેરેસા વિઆનાનો મેજિકલ ગોલ
બીજા હાફમાં પણ પાઇપર્સની ટીમે દબાણ જાળવી રાખ્યું હતું. અંતિમ ક્વાર્ટરની પ્રથમ મિનિટે એટલે કે ૪૬મી મિનિટે ટેરેસા વિઆનાએ જાદુઈ રમત બતાવી હતી. તેણે મેદાનની ડાબી બાજુએથી જગ્યા બનાવી, રાંચી રોયલ્સના ગોલકીપરને ડ્રિબલ કરીને છેતરી અને બોલને નેટમાં ધકેલી દીધો હતો. આ બીજા ગોલ સાથે SG પાઇપર્સની જીત નિશ્ચિત થઈ ગઈ હતી.
રાંચી રોયલ્સની તક ગુમાવી
સ્થાનિક પ્રેક્ષકોના ભારે સમર્થન વચ્ચે રમી રહેલી રાંચી રોયલ્સની ટીમે ગોલ કરવાના અનેક પ્રયત્નો કર્યા હતા, પરંતુ પાઇપર્સના મજબૂત ડિફેન્સ અને ગોલકીપર સામે તેમની એક પણ ચાલી નહોતી. SG પાઇપર્સે આ વિજય સાથે ટુર્નામેન્ટમાં પ્રભાવશાળી શરૂઆત કરી છે અને મહત્વના પોઈન્ટ્સ હાંસલ કર્યા છે.