સિડની, તા.૦૭ : એશિઝ સીરીઝની પાંચમી ટેસ્ટ મેચમાં ઇંગ્લેન્ડના ૨૨ વર્ષીય યુવા ઓલરાઉન્ડર જેકબ બેથેલે પોતાની બેટિંગથી ક્રિકેટ જગતને ચોંકાવી દીધું છે. સિડની ક્રિકેટ ગ્રાઉન્ડ (SCG) પર રમાઈ રહેલી આ મેચના ચોથા દિવસે બેથેલે પોતાની પ્રથમ ફર્સ્ટ-ક્લાસ સદી ફટકારીને ભારતની શાન કપિલ દેવની એક અત્યંત દુર્લભ ક્લબમાં પ્રવેશ મેળવ્યો છે. બેથેલે બ્યુ વેબસ્ટરના બોલ પર મિડ-વિકેટમાં શાનદાર ચોગ્ગો ફટકારીને પોતાની આ યાદગાર ઇનિંગ પૂરી કરી હતી.

આ સદી સાથે જેકબ બેથેલ વિશ્વ ક્રિકેટનો એવો પાંચમો ખેલાડી બની ગયો છે જેણે પોતાની કારકિર્દીની પ્રથમ ફર્સ્ટ-ક્લાસ સદી અને પ્રથમ લિસ્ટ-એ સદી બંને આંતરરાષ્ટ્રીય મેચો દરમિયાન ફટકારી હોય. આ અગાઉ આ અસામાન્ય સિદ્ધિ માત્ર કપિલ દેવ, માર્લોન સેમ્યુઅલ્સ, મેહદી હસન મિરાઝ અને કર્ટિસ કેમ્પરના નામે જ હતી. બેથેલની આ ૧૪૨ રનની અણનમ ઇનિંગે માત્ર તેની ટેલેન્ટ જ નહીં પરંતુ દબાણ હેઠળ રમવાની તેની અદભૂત ક્ષમતા પણ સાબિત કરી દીધી છે.

ઐતિહાસિક દ્રષ્ટિએ જોઈએ તો, ૨૨ વર્ષ અને ૭૬ દિવસની ઉંમરે એશિઝમાં સદી ફટકારનાર તે બીજા વિશ્વયુદ્ધ પછીનો ત્રીજો સૌથી યુવા ઇંગ્લિશ બેટ્સમેન બન્યો છે. આ અગાઉ માત્ર ડેવિડ ગોવર અને એલિસ્ટર કૂકે જ તેનાથી નાની ઉંમરે એશિઝમાં સદી નોંધાવી હતી. વધુમાં, ઈંગ્લેન્ડ માટે ૧૯૮૯માં જેક રસેલ પછી ટેસ્ટમાં જ પોતાની પ્રથમ ફર્સ્ટ-ક્લાસ સદી ફટકારનાર તે પ્રથમ ખેલાડી છે. સ્ટેન્ડમાં હાજર તેના પરિવારની આંખોમાં હર્ષના આંસુ હતા જ્યારે બેથેલે હેલ્મેટ ઉતારીને પ્રેક્ષકોનું અભિવાદન ઝીલ્યું હતું. આ ઇનિંગે ઇંગ્લેન્ડને મેચમાં મજબૂત સ્થિતિમાં લાવી દીધું છે.