મેલબોર્ન  : ઓસ્ટ્રેલિયાની પ્રતિષ્ઠિત ટૂર્નામેન્ટ બિગ બેશ લીગ (BBL) માં ગુરુવારે મેલબોર્ન સ્ટાર્સ અને સિડની સિક્સર્સ વચ્ચે રમાયેલી મેચમાં રમત કરતા વિવાદની વધુ ચર્ચા થઈ રહી છે. મેલબોર્ન સ્ટાર્સના કેપ્ટન માર્કસ સ્ટોઈનિસે પાકિસ્તાનના સ્ટાર ઓપનર બાબર આઝમને આઉટ કર્યા બાદ જે રીતે ઉજવણી કરી, તેણે ક્રિકેટ જગતમાં નવી ચર્ચા છેડી દીધી છે. સ્ટોઈનિસે મેદાન પર પોતાનો સંયમ ગુમાવીને બાબરનો સામનો કર્યો હતો, જેનો વીડિયો અત્યારે સોશિયલ મીડિયા પર વાયુવેગે પ્રસર્યો છે.
બદલો લેવાની આગમાં સ્ટોઈનિસ
મેચની શરૂઆતમાં જ્યારે સ્ટોઈનિસ બેટિંગ કરી રહ્યો હતો, ત્યારે તે ૩૩ રન બનાવીને આઉટ થયો હતો. પરંતુ જ્યારે બોલિંગનો વારો આવ્યો ત્યારે તેણે વ્યાજ સાથે બદલો લીધો હતો. સિડની સિક્સર્સ તરફથી રમી રહેલા બાબર આઝમ જ્યારે ૧૪ રન પર રમી રહ્યો હતો, ત્યારે સ્ટોઈનિસના એક શાનદાર બોલ પર તે મ્હાત ખાઈ ગયો. બોલ સીધો તેના પેડ પર વાગ્યો અને અમ્પાયરે તેને LBW જાહેર કર્યો. વિકેટ મળતા જ સ્ટોઈનિસનો ઉત્સાહ જોખમી બની ગયો અને તેણે બાબરના ચહેરા સામે જઈને આક્રમક રીતે બૂમો પાડીને તેની વિદાયની ઉજવણી કરી હતી.
બાબર આઝમનો સંયમ અને રેકોર્ડ
પાકિસ્તાનનો પૂર્વ કેપ્ટન બાબર આઝમ તેની શાંત પ્રકૃતિ માટે જાણીતો છે. સ્ટોઈનિસના આ આક્રમક વર્તન છતાં બાબરે કોઈ મોટું રિએક્શન આપ્યું નહીં અને રિવ્યુ લીધા વગર મેદાનની બહાર જવાનું પસંદ કર્યું. નોંધનીય છે કે બાબર આઝમ આંતરરાષ્ટ્રીય ક્રિકેટમાં ૧૫,૦૦૦ થી વધુ રન ધરાવે છે અને તે વનડેમાં સૌથી ઝડપી ૫,૦૦૦ રન બનાવનારો ખેલાડી છે. બિગ બેશ લીગે તેને આ સિઝન માટે એક મોટી રકમ આપીને કરારબદ્ધ કર્યો છે, જે આ લીગના ઇતિહાસના સૌથી મોટા સોદામાંનો એક છે.
સોશિયલ મીડિયા પર યુદ્ધ
માર્કસ સ્ટોઈનિસની આ હરકત બાદ સોશિયલ મીડિયા પર ચાહકો બે ભાગમાં વહેંચાઈ ગયા છે. કેટલાક ઓસ્ટ્રેલિયન ચાહકો તેને મેદાનની આક્રમકતા ગણાવી રહ્યા છે, જ્યારે પાકિસ્તાની ચાહકો અને ઘણા ક્રિકેટ નિષ્ણાતો સ્ટોઈનિસના વર્તનને 'ખેલ ભાવના' વિરુદ્ધ ગણાવી રહ્યા છે. અગાઉ શાહીન આફ્રિદીએ પણ ભારત-પાક દુશ્મનાવટ વચ્ચે આવી જ ટીકાઓનો સામનો કરવો પડ્યો હતો, ત્યારે હવે સ્ટોઈનિસનો આ વિવાદ આગમાં ઘી હોમવાનું કામ કરી રહ્યો છે.