નવી દિલ્હી, તા. 28 : ભારતીય ક્રિકેટ ટીમ જ્યારે ઘરઆંગણે ટેસ્ટ શ્રેણી ગુમાવી રહી છે ત્યારે દિગ્ગજ બેટ્સમેન અને પૂર્વ મુખ્ય કોચ રાહુલ દ્રવિડે આ પતન પાછળના ચોંકાવનારા કારણો જાહેર કર્યા છે. બેંગલુરુમાં રોહિત શર્માના પુસ્તક વિમોચન પ્રસંગે દ્રવિડે સ્પષ્ટ કર્યું હતું કે, આજના ખેલાડીઓ પાસે ટેસ્ટ મેચની કઠિન કુશળતા વિકસાવવા માટે પૂરતો સમય જ નથી.
સફેદ બોલની પ્રેક્ટિસ અને લાલ બોલની ઉપેક્ષા
દ્રવિડના મતે, આધુનિક ક્રિકેટર આખું વર્ષ IPL અને T20 ફોર્મેટમાં વ્યસ્ત રહે છે. તેમણે કહ્યું, "કોચ તરીકે મેં જોયું છે કે ખેલાડીઓ ટેસ્ટ મેચના માત્ર ૩-૪ દિવસ પહેલા આવે છે. ઘણીવાર તો એવું બન્યું છે કે ખેલાડીએ છેલ્લે ૫ મહિના પહેલા લાલ બોલને હાથ લગાવ્યો હોય! ટર્ન લેતી પીચો પર કલાકો સુધી બેટિંગ કરવા માટે જે ટેકનિક જોઈએ, તે અચાનક વિકસિત થતી નથી."
શુભમન ગિલની વાતમાં કેટલું દમ?
તાજેતરમાં શુભમન ગિલે પણ ફરિયાદ કરી હતી કે તેમને ટેસ્ટની તૈયારી માટે પૂરતો સમય મળતો નથી. આ અંગે દ્રવિડે ટેકો આપતા કહ્યું કે, "ગિલ ત્રણેય ફોર્મેટ રમે છે, એટલે તેને સમજાયું છે કે લાલ બોલની તૈયારી કરવી કેટલી મુશ્કેલ છે. અમારી પેઢીમાં ફ્રેન્ચાઇઝી ક્રિકેટ નહોતું, એટલે અમને ટેસ્ટ શ્રેણી પહેલા આખો મહિનો માત્ર લાલ બોલથી પ્રેક્ટિસ કરવાની તક મળતી હતી."
T20 માં પાવરહાઉસ, પણ ટેસ્ટમાં કેમ પાછળ?
દ્રવિડે એક રસપ્રદ તુલના કરી હતી. તેમણે જણાવ્યું કે ભારત T20 માં એટલા માટે મજબૂત છે કારણ કે ખેલાડીઓ IPL દરમિયાન અઢી મહિના માત્ર સિક્સર મારવાની પ્રેક્ટિસ કરે છે. પરિણામે તેઓ વ્હાઇટ બોલમાં નિષ્ણાત બની જાય છે, પણ તેની સીધી અસર ટેસ્ટ ફોર્મેટ પર પડે છે. અત્યારે ભારત વર્લ્ડ ટેસ્ટ ચેમ્પિયનશિપ (WTC) ના પોઈન્ટ ટેબલમાં છઠ્ઠા સ્થાને ફેંકાઈ ગયું છે, જે ચિંતાનો વિષય છે.
પિચોનો મિજાજ પણ બદલાયો
WTC ના કારણે હવે દરેક મેચ જીતવી અનિવાર્ય બની ગઈ છે. આથી હોમ ટીમ એવી પિચો બનાવે છે જે પરિણામલક્ષી હોય. આવી બોલરોને અનુકૂળ પિચો પર ટકી રહેવા માટે જે સંયમ અને ટેકનિક જોઈએ, તે આજના 'ફાસ્ટ' યુગના બેટ્સમેનોમાં ખૂટી રહી હોય તેવું દ્રવિડના વિશ્લેષણ પરથી સ્પષ્ટ જણાય છે.