કોટંબી (વડોદરા): મહિલા પ્રીમિયર લીગ 2026 માં શુક્રવારે એક અત્યંત રોમાંચક મુકાબલો જોવા મળ્યો. કોટંબીના બીસીએ સ્ટેડિયમ ખાતે રમાયેલી મેચમાં ગુજરાત જાયન્ટ્સે શાનદાર રમત બતાવીને ડિફેન્ડિંગ ચેમ્પિયન મુંબઈ ઇન્ડિયન્સને ૧૧ રનથી હરાવી દીધું છે. આ જીત સાથે જ જાયન્ટ્સે એલિમિનેટર રાઉન્ડ માટે પોતાનું સ્થાન પાકું કરી લીધું છે. ખાસ વાત એ છે કે, WPL ના ઇતિહાસમાં ૯ મુકાબલા બાદ ગુજરાતનો મુંબઈ સામે આ પહેલો વિજય છે.
ગાર્ડનર અને વેરહેમની જોડીએ જમાવી બાજી
ટોસ જીતીને પહેલા બેટિંગ કરવા ઉતરેલી ગુજરાત જાયન્ટ્સની શરૂઆત સાધારણ રહી હતી. બેથ મૂની જલ્દી આઉટ થઈ ગઈ હતી, પરંતુ સોફી ડિવાઇન અને અનુષ્કા શર્માએ પાવરપ્લેનો સારો ઉપયોગ કર્યો હતો. એક સમયે ટીમનો રન રેટ ધીમો પડ્યો હતો, પરંતુ અંતિમ ઓવરોમાં એશ ગાર્ડનર (૪૬ રન) અને જ્યોર્જિયા વેરહેમ (૪૪* રન) ની આક્રમક બેટિંગે સ્કોરને ૧૬૭/૪ સુધી પહોંચાડ્યો હતો. મુંબઈ તરફથી અમેલિયા કેરે ૨ વિકેટ ઝડપી હતી.
હરમનપ્રીત કૌરની એકલપંડે લડત
૧૬૮ રનના લક્ષ્યનો પીછો કરવા ઉતરેલી મુંબઈની ટીમ શરૂઆતમાં જ મુશ્કેલીમાં મુકાઈ ગઈ હતી. રેણુકા ઠાકુર અને કાશ્વી ગૌતમની ધારદાર બોલિંગ સામે ઓપનરો નિષ્ફળ રહ્યા હતા. મુંબઈએ માત્ર ૩૭ રનમાં ૩ વિકેટ ગુમાવી દીધી હતી. આ કપરા સમયે કેપ્ટન હરમનપ્રીત કૌરે મેદાન સંભાળ્યું અને ૪૮ બોલમાં અણનમ ૮૨* રનની તોફાની ઇનિંગ રમી હતી. તેણે પોતાની અડધી સદીમાં ગાયકવાડને ગગનચુંબી છગ્ગા ફટકારીને મેચમાં રોમાંચ જાળવી રાખ્યો હતો.
અંતિમ ઓવરનો હાઈ-વોલ્ટેજ ડ્રામા
છેલ્લી ઓવરમાં મુંબઈને જીતવા માટે ૨૬ રનની જરૂર હતી. એશ ગાર્ડનર બોલિંગ કરવા આવી ત્યારે હરમનપ્રીત કૌરે હુમલો કરવાનો પ્રયાસ કર્યો હતો, પરંતુ તે ૧૧ રન ટૂંકી પડી અને મુંબઈનો સ્કોર ૧૫૬/૭ પર અટકી ગયો. સોફી ડિવાઇન અને વેરહેમે ૨-૨ વિકેટ લઈને મુંબઈની કમર તોડી નાખી હતી.
મુંબઈ માટે હવે 'કરો યા મરો' જેવી સ્થિતિ
આ હાર બાદ મુંબઈ ઇન્ડિયન્સની ટૂર્નામેન્ટમાં આગળ વધવાની આશા હવે અન્ય ટીમોના પરિણામ પર નિર્ભર છે. જો રવિવારે દિલ્હી કેપિટલ્સ જીતશે, તો હરમનપ્રીતની ટીમ પહેલીવાર ગ્રુપ સ્ટેજમાંથી બહાર થઈ જશે. પરંતુ જો યુપી વોરિયર્સ જીતશે, તો નેટ રન રેટના આધારે મુંબઈ ક્વોલિફાય થઈ શકે છે.