મુંબઈ: આઈસીસી ટી-20 વર્લ્ડ કપ 2026માં ભારત અને અમેરિકા વચ્ચેના જંગ પહેલા મુંબઈના વાનખેડે સ્ટેડિયમમાં એક અત્યંત હળવી ક્ષણ જોવા મળી હતી. મેચના ટોસ માટે જ્યારે સૂર્યકુમાર યાદવ મેદાન પર ઉતર્યા, ત્યારે તેમણે બાઉન્ડ્રી લાઇન પાસે ઉભેલા પૂર્વ કેપ્ટન રોહિત શર્મા તરફ દોડીને પૂછ્યું હતું કે, "જલ્દી બોલો, બેટિંગ કરું કે બોલિંગ?" રોહિત શર્માએ પોતાની લાક્ષણિક અંદાજમાં વળતો જવાબ આપ્યો, "ફિલ્ડિંગ કર, પાગલ હૈ ક્યા?" રોહિતની આ રમતિયાળ શૈલી અને સૂર્યાનું સ્મિત કેમેરામાં કેદ થતા જ સ્ટેડિયમમાં હાસ્યનું મોજું ફરી વળ્યું હતું.

આ મુકાબલામાં રોહિત શર્માની ભૂમિકા ખૂબ જ ખાસ હતી. ૨૦૨૪ના વર્લ્ડ કપ વિજેતા કેપ્ટન તરીકે રોહિત શર્મા આ વખતે આઈસીસીના બ્રાન્ડ એમ્બેસેડર તરીકે સ્ટેડિયમમાં હાજર રહ્યો હતો. મેચની શરૂઆત પહેલા રોહિત શર્મા જ્યારે વર્લ્ડ કપની ઝગમગતી ટ્રોફી લઈને મેદાન પર આવ્યો, ત્યારે આખું વાનખેડે સ્ટેડિયમ તેના નામની ગુંજથી ગાજી ઉઠ્યું હતું. ભલે રોહિત અત્યારે ટીમનો સક્રિય કેપ્ટન ન હોય, પરંતુ મેદાન પર તેની હાજરી અને વર્તમાન કેપ્ટન સૂર્યકુમાર યાદવ સાથેના તેના સંબંધો દર્શાવે છે કે ભારતીય ટીમમાં હજુ પણ કેવો મજબૂત બંધન છે.

સૂર્યા અને રોહિત વચ્ચેની આ વાતચીતનો વીડિયો થોડી જ મિનિટોમાં સોશિયલ મીડિયા પર વાયરલ થઈ ગયો હતો. ચાહકો આ 'મુંબઈકર' જોડીના વખાણ કરી રહ્યા છે અને કહી રહ્યા છે કે ભલે કેપ્ટન બદલાઈ ગયા હોય, પણ રોહિતનો માર્ગદર્શક તરીકેનો અંદાજ આજે પણ અકબંધ છે. વાનખેડેના ગ્રાઉન્ડ પર બંને ખેલાડીઓ વચ્ચેની આ ક્ષણે દર્શકોને જૂની યાદો તાજી કરાવી દીધી હતી. ક્રિકેટ માત્ર હાર-જીત કે રનનો ખેલ નથી, પરંતુ મેદાનની બહારના આવા સંબંધો પણ આ રમતને અદભુત બનાવે છે.

મેચની વાત કરીએ તો, ભારતીય ટીમે અમેરિકા સામે આ મુકાબલામાં શાનદાર વિજય મેળવ્યો હતો. સૂર્યકુમાર યાદવે રોહિતની એ 'મજાકિયા' સલાહને ગંભીરતાથી લીધી હોય તેમ ભારતે મેદાન પર શાનદાર ફિલ્ડિંગ અને બોલિંગનું પ્રદર્શન કર્યું હતું. વાનખેડેની સાંજ માત્ર ભારતીય ટીમની જીત માટે જ નહીં, પણ રોહિત અને સૂર્યા વચ્ચેના આ 'યારાના' માટે પણ હંમેશા યાદ રાખવામાં આવશે. આ જીત સાથે ભારતે વર્લ્ડ કપના આગામી રાઉન્ડ તરફ મજબૂત ડગ માંડ્યા છે.