રાજકોટ:  ICC મેન્સ T20 વર્લ્ડ કપ ૨૦૨૬માં આજે ન્યુઝીલેન્ડે એક એવો ઈતિહાસ રચ્યો છે જે ક્રિકેટ પ્રેમીઓ વર્ષો સુધી યાદ રાખશે. સંયુક્ત આરબ અમીરાત (UAE) સામેની મેચમાં ન્યુઝીલેન્ડના બેટ્સમેનોએ એવી બેટિંગ કરી કે રેકોર્ડ બુકના પાના ટૂંકા પડ્યા. ૧૭૪ રનના પડકારજનક લક્ષ્યાંક સામે કિવી ટીમે એક પણ વિકેટ ગુમાવ્યા વિના માત્ર ૧૫.૨ ઓવરમાં જ જીત મેળવી લીધી હતી.
પહેલા બેટિંગ કરતા UAE એ ૨૦ ઓવરમાં ૬ વિકેટે ૧૭૩ રનનો સન્માનજનક સ્કોર બનાવ્યો હતો. પરંતુ, જ્યારે ન્યુઝીલેન્ડની જોડી મેદાનમાં ઉતરી ત્યારે સ્ટેડિયમમાં ચોગ્ગા અને છગ્ગાની રમઝટ બોલી ગઈ હતી. ટિમ શેફાર્ટે માત્ર ૪૨ બોલમાં ૮૯ રનની તોફાની ઇનિંગ રમી, તો બીજી તરફ ફિન એલેને ૫૦ બોલમાં ૮૪ રન ફટકારીને વિરોધી ટીમના બોલરોને બિલકુલ લાચાર કરી દીધા હતા.
આ મેચમાં સૌથી મોટી હાઈલાઈટ એ રહી કે શેફાર્ટ અને એલેને મળીને ૧૭૫ રનની અણનમ ભાગીદારી નોંધાવી. આ સાથે જ તેમણે T20 વર્લ્ડ કપના ઈતિહાસમાં કોઈપણ વિકેટ માટે સૌથી મોટી ભાગીદારીનો નવો વર્લ્ડ રેકોર્ડ સ્થાપિત કર્યો છે. અગાઉ આ રેકોર્ડ ઈંગ્લેન્ડના જોસ બટલર અને એલેક્સ હેલ્સના નામે હતો, જેમણે ૨૦૨૨ના વર્લ્ડ કપમાં ભારત સામે એડિલેડમાં ૧૭૦ રન બનાવ્યા હતા.
વર્લ્ડ કપના ઇતિહાસમાં ૧૦ વિકેટથી જીત મેળવનારી ન્યુઝીલેન્ડ હવે છઠ્ઠી ટીમ બની ગઈ છે. આ યાદીમાં ઓસ્ટ્રેલિયા, દક્ષિણ આફ્રિકા, ઓમાન, પાકિસ્તાન અને ઇંગ્લેન્ડ સામેલ છે. ખાસ વાત એ છે કે, ન્યુઝીલેન્ડની આ જોડીએ પોતાની ઇનિંગ દરમિયાન કુલ ૧૭ ચોગ્ગા અને ૮ આકાશચુંબી છગ્ગા ફટકારીને રનરેટને રોકેટની ગતિએ આગળ વધાર્યો હતો.
કિવી ટીમની આ જીતે અન્ય મોટી ટીમો માટે ખતરાની ઘંટડી વગાડી દીધી છે. જે રીતે ઓપનરોએ માત્ર ૯૨ બોલમાં મેચ ખતમ કરી, તે જોતા ન્યુઝીલેન્ડ હવે ટાઈટલ જીતવા માટે પ્રબળ દાવેદાર માનવામાં આવી રહી છે.