ચેન્નાઈ: T20 વર્લ્ડ કપ 2026ના રોમાંચ વચ્ચે ન્યુઝીલેન્ડ ક્રિકેટ ટીમ માટે એક ચોંકાવનારા સમાચાર સામે આવ્યા છે. કિવિ ટીમના મુખ્ય ફાસ્ટ બોલર લોકી ફર્ગ્યુસન ટુર્નામેન્ટ છોડીને અચાનક પોતાના વતન પરત ફર્યા છે. ભારતની ધરતી પર રમાઈ રહેલા આ મહાકુંભમાં ફર્ગ્યુસનની વિદાયથી ચાહકોમાં અનેક તર્ક-વિતર્ક સર્જાયા હતા, પરંતુ હવે ન્યુઝીલેન્ડ ટીમ મેનેજમેન્ટે આ મામલે સત્તાવાર ખુલાસો કરીને સ્થિતિ સ્પષ્ટ કરી છે. ફર્ગ્યુસન કોઈ ઈજાને કારણે નહીં, પરંતુ તેના જીવનના સૌથી મહત્વપૂર્ણ અને ખુશીના અવસરે તેના પરિવાર સાથે રહેવા માટે રવાના થયો છે.

લોકી ફર્ગ્યુસન અને તેની પત્ની એમ્મા તેમના પ્રથમ બાળકના સ્વાગતની તૈયારી કરી રહ્યા છે. પત્નીની ડિલિવરીના સમયે હાજર રહેવા માટે ફર્ગ્યુસને બોર્ડ પાસે રજા માંગી હતી, જેને કોચ રોબ વોલ્ટરે સહર્ષ સ્વીકારી લીધી છે. કોચે જણાવ્યું હતું કે, "આ લોકીના જીવનની અત્યંત ભાવનાત્મક અને ખાસ ક્ષણ છે. અમે ઇચ્છીએ છીએ કે તે આ ખુશીના પ્રસંગે તેના પરિવાર સાથે રહે." જોકે, તેની ગેરહાજરી 17 ફેબ્રુઆરીએ ચેન્નાઈના ચેપોક સ્ટેડિયમ ખાતે કેનેડા સામે રમાનારી ગ્રુપ સ્ટેજની અંતિમ મેચમાં ન્યુઝીલેન્ડની મુસીબતો વધારી શકે છે.

ફર્ગ્યુસન અત્યાર સુધી વર્લ્ડ કપમાં શાનદાર ફોર્મમાં રહ્યો છે અને 3 મેચમાં 4 મહત્વની વિકેટો ઝડપી છે. તેની ગેરહાજરીમાં હવે બેન સીઅર્સ અથવા કોલ મેકકોન્ચીને પ્લેઈંગ ઈલેવનમાં તક મળી શકે છે. જોકે, કિવિ ચાહકો માટે રાહતના સમાચાર એ છે કે ફર્ગ્યુસન ટુર્નામેન્ટમાંથી કાયમ માટે બહાર થયો નથી. જો બધું જ પ્લાન મુજબ ચાલશે, તો તે સુપર-8 તબક્કા પહેલા ફરી ટીમ સાથે જોડાઈ જશે. અત્યારે તો ન્યુઝીલેન્ડની ટીમ તેના સ્ટાર બોલર વગર કેનેડાના પડકારને ઝીલવા માટે રણનીતિ ઘડી રહી છે.