કોલંબો : ટી-20 વર્લ્ડ કપના સુપર-8 પહેલા જ ઝિમ્બાબ્વેએ ક્રિકેટ જગતને પોતાની તાકાતનો પરચો આપી દીધો છે. કોલંબોના મેદાન પર રમાયેલી હાઈ-વોલ્ટેજ મેચમાં, સિકંદર રઝાની વિસ્ફોટક બેટિંગ અને બ્રાયન બેનેટની ધીરજપૂર્વકની અડધી સદીના જોરે ઝિમ્બાબ્વેએ શ્રીલંકાને તેના જ ઘરમાં 6 વિકેટે હરાવીને સનસનાટી મચાવી દીધી છે. શ્રીલંકાની ટીમ જે અત્યાર સુધી અજેય જણાતી હતી, તેની વિજયકૂચ પર રઝાએ બ્રેક લગાવી દીધી છે.
સિકંદર રઝાનો 'પાવર શો'
શ્રીલંકાએ પ્રથમ બેટિંગ કરતા પથુમ નિસાન્કાના 62 રન અને પવન રથનાયકેના અંતિમ ઓવરોમાં ફટકારેલા 44 રનની મદદથી 178 રનનો મજબૂત સ્કોર બનાવ્યો હતો. જવાબમાં ઝિમ્બાબ્વેની શરૂઆત સારી રહી હતી, પરંતુ સાચો રોમાંચ ત્યારે શરૂ થયો જ્યારે કેપ્ટન સિકંદર રઝા મેદાનમાં ઉતર્યો. રઝાએ માત્ર 26 બોલમાં 45 રનની ઈનિંગ રમીને શ્રીલંકાના બોલરોને બાનમાં લીધા હતા. તેણે દુષણ હેમંથ અને થીકશનાની ઓવરમાં ગગનચુંબી છગ્ગા ફટકારીને આખી રમત પલટી નાખી હતી.
બેનેટની ઐતિહાસિક અડધી સદી
બીજી તરફ, યુવા બેટ્સમેન બ્રાયન બેનેટે 63 રનની અણનમ ઈનિંગ રમીને નવો રેકોર્ડ બનાવ્યો છે. તે ટી-20 વર્લ્ડ કપમાં સતત અડધી સદી ફટકારનાર પ્રથમ ઝિમ્બાબ્વેન ખેલાડી બન્યો છે. રઝા આઉટ થયા બાદ અંતિમ ઓવરમાં જ્યારે 8 રનની જરૂર હતી, ત્યારે ટોની મુન્યોંગાએ સિક્સર ફટકારીને જીત નજીક લાવી દીધી હતી અને બેનેટે વિજયી રન લઈને મેચ પૂરી કરી હતી.
શ્રીલંકાની વ્યૂહરચના નિષ્ફળ
શ્રીલંકા તરફથી નિસાન્કાએ પાવરપ્લેમાં શાનદાર પ્રદર્શન કર્યું હતું, પરંતુ મધ્ય ઓવરોમાં ઝિમ્બાબ્વેના સ્પિનરો ગ્રીમ ક્રેમર અને વેલિંગ્ટન મસાકડઝાએ શ્રીલંકાની રનગતિ પર અંકુશ મેળવ્યો હતો. થીકશના અને મદુશંકા જેવા સ્ટાર બોલરો રઝાના આક્રમણ સામે લાચાર દેખાયા હતા. આ જીત સાથે ઝિમ્બાબ્વેએ સુપર-8 માટે પોતાનો આત્મવિશ્વાસ સાતમા આસમાને પહોંચાડી દીધો છે.