નવી દિલ્હી, તા. 24: T20 વર્લ્ડ કપ 2026ના સુપર-8 તબક્કામાં હવે ખરાખરીનો જંગ જામવા જઈ રહ્યો છે. 26 ફેબ્રુઆરીના રોજ ભારત અને ઝિમ્બાબ્વે વચ્ચે મહત્વનો મુકાબલો રમાનાર છે. જોકે ટીમ ઈન્ડિયાએ આ ટુર્નામેન્ટમાં પોતાની પહેલી સુપર-8 મેચમાં હારનો સ્વાદ ચાખવો પડ્યો છે, પરંતુ આગામી મેચ માટે આંકડાઓ ભારતની તરફેણમાં ગવાહી આપી રહ્યા છે. ઝિમ્બાબ્વે સામેનો ભારતનો ટ્રેક રેકોર્ડ જોતા ચાહકોને મોટી જીતની આશા છે.
આમને-સામને: ભારતનો દબદબો
ભારત અને ઝિમ્બાબ્વે વચ્ચે અત્યાર સુધીમાં કુલ 13 T20 મેચો રમાઈ છે. જેમાં ભારતનો ઘોડો વિજયી રહ્યો છે:
•    ભારતની જીત: 10 મેચ
•    ઝિમ્બાબ્વેની જીત: 03 મેચ
•    વર્લ્ડ કપ રેકોર્ડ: વર્લ્ડ કપના મંચ પર બંને ટીમો એકવાર ટકરાઈ છે, જેમાં ભારતે વિજય મેળવ્યો હતો.
 
ઐતિહાસિક સફર: ક્યારે શું થયું?
બંને દેશો વચ્ચે પ્રથમ ટી-20 જંગ 12 જૂન, 2010ના રોજ ખેલાયો હતો, જેમાં ભારતે 6 વિકેટથી જીત મેળવી શ્રેણીની શરૂઆત કરી હતી. ત્યારબાદ 2015માં રમાયેલી શ્રેણી 1-1થી ડ્રો રહી હતી. જોકે, 2016માં ઝિમ્બાબ્વેએ ભારતને પ્રથમ મેચમાં માત્ર 2 રને હરાવીને મોટો અપસેટ સર્જ્યો હતો, પણ ભારતે જોરદાર વાપસી કરીને શ્રેણી 2-1થી પોતાના નામે કરી હતી.
છેલ્લો જંગ અને 2024ની શ્રેણી
ટી-20 વર્લ્ડ કપ 2022ની યાદો તાજી કરીએ તો, મેલબોર્નમાં ભારતે 186 રન ફટકાર્યા બાદ ઝિમ્બાબ્વેને માત્ર 115 રનમાં ઓલઆઉટ કરી દીધું હતું. તો છેલ્લે જુલાઈ 2024માં રમાયેલી 5 મેચની શ્રેણીમાં પણ ઝિમ્બાબ્વેએ પ્રથમ મેચ જીતીને ભારતને ચોંકાવ્યું હતું, પરંતુ ત્યારબાદ યુવા ટીમ ઈન્ડિયાએ રૌદ્ર સ્વરૂપ ધારણ કરી સતત ચાર મેચ જીતીને શ્રેણી 4-1 થી કબ્જે કરી હતી.
હવે જ્યારે 26 ફેબ્રુઆરીએ સુપર-8માં બંને ટીમો ફરી ટકરાશે, ત્યારે શું ઝિમ્બાબ્વે ફરી કોઈ ઉલટફેર કરશે કે પછી ટીમ ઈન્ડિયા તેનો 'વિજયી રથ' આગળ ધપાવી સેમીફાઈનલ તરફ ડગ માંડશે, તેના પર સૌની નજર છે.