ઢાકા, તા. ૨૬: ક્રિકેટ પ્રેમીઓ માટે મોટા સમાચાર સામે આવી રહ્યા છે. બાંગ્લાદેશ ક્રિકેટ બોર્ડ (BCB) આખરે તેની પ્રથમ 'મહિલા બાંગ્લાદેશ પ્રીમિયર લીગ' (WBPL) શરૂ કરવા માટે સજ્જ છે. આ ઐતિહાસિક ટુર્નામેન્ટને વધુ રોમાંચક બનાવવા માટે બાંગ્લાદેશ બોર્ડ ભારતની સ્ટાર મહિલા ક્રિકેટરોને આ લીગમાં સામેલ કરવા માટે આતુર છે. બુધવારે મીરપુર ખાતે યોજાયેલી મહત્વની બેઠક બાદ આ જાહેરાત કરવામાં આવી હતી.

WBPL ગવર્નિંગ કાઉન્સિલના અધ્યક્ષ રૂબાબા ડોવલાએ જણાવ્યું હતું કે, ભારતની મહિલા ખેલાડીઓ માટે આ લીગના દરવાજા હંમેશા ખુલ્લા છે. ઉલ્લેખનીય છે કે ભારતીય પુરુષ ખેલાડીઓ વિદેશી લીગમાં રમી શકતા નથી, પરંતુ મહિલા ખેલાડીઓ બિગ બેશ અને ધ હંડ્રેડ જેવી મોટી ટૂર્નામેન્ટમાં ભાગ લે છે. જો BCCI ની પરવાનગી મળશે, તો ભારતીય સ્ટાર ખેલાડીઓ બાંગ્લાદેશમાં મેદાન ગજવતી જોવા મળી શકે છે. આ પગલાથી બાંગ્લાદેશ અને ભારતના ક્રિકેટ બોર્ડ વચ્ચેના સંબંધો પણ વધુ મજબૂત થવાની આશા છે.

ટુર્નામેન્ટના ફોર્મેટ વિશે વાત કરીએ તો, આ વખતે ૪ એપ્રિલથી ૧૪ એપ્રિલ દરમિયાન માત્ર ૩ ટીમો વચ્ચે જંગ જામશે. ખેલાડીઓની પસંદગી માટે હરાજીને બદલે આઈપીએલ મોડલ પર આધારિત 'ડ્રાફ્ટ સિસ્ટમ'નો ઉપયોગ કરવામાં આવશે. દરેક ટીમમાં ઓછામાં ઓછા ૨ થી ૪ વિદેશી ખેલાડીઓ રાખવા ફરજિયાત હશે. આ ટુર્નામેન્ટની શરૂઆત ચટ્ટોગ્રામમાં થશે અને ફાઈનલ મેચ ઢાકામાં રમાશે.

ખેલાડીઓના વળતર માટે પણ BCB એ તિજોરી ખોલી છે. આઇકોન ખેલાડીઓને ૧૦ લાખ બાંગ્લાદેશી ટકા (Taka) મળશે, જ્યારે અન્ય શ્રેણીના ખેલાડીઓ માટે ૧.૫ લાખથી ૭ લાખ ટકા સુધીની રકમ નક્કી કરવામાં આવી છે. વિશ્વભરની ઘણી જાણીતી મહિલા ક્રિકેટરોએ આ ટુર્નામેન્ટમાં રમવા માટે અત્યારથી જ રસ દાખવ્યો છે. હવે જોવાનું એ રહેશે કે એપ્રિલ મહિનામાં બાંગ્લાદેશની ધરતી પર કયા કયા આંતરરાષ્ટ્રીય સિતારાઓ પોતાની પ્રતિભાના કામણ પાથરે છે.