કોલકાતા : T20 વર્લ્ડ કપ 2026 પૂરો થયા બાદ જ્યારે આખી દુનિયા જીતનો જશ્ન મનાવી રહી છે, ત્યારે બીજી તરફ વેસ્ટ ઇન્ડીઝ અને દક્ષિણ આફ્રિકાના ખેલાડીઓ માટે ઘરવાપસીનો રસ્તો મુશ્કેલ બની ગયો છે. અમેરિકા અને ઇઝરાયલના ઈરાન પરના હુમલાને કારણે પશ્ચિમ એશિયાના હવાઈ ક્ષેત્ર (Airspace) પર પ્રતિબંધો લાદવામાં આવ્યા છે, જેના કારણે ભારતથી આફ્રિકા અને કેરેબિયન દેશો તરફ જતી ફ્લાઈટ્સ ખોરવાઈ ગઈ છે.
ચાર્ટર્ડ ફ્લાઈટ છેલ્લી ઘડીએ રદ
અગાઉ એવી યોજના હતી કે બંને ટીમોના ખેલાડીઓને કોલકાતાથી જોહાનિસબર્ગ માટે એક ખાસ ચાર્ટર્ડ ફ્લાઈટમાં મોકલવામાં આવશે. જોકે, લોજિસ્ટિકલ સમસ્યાઓ અને હવાઈ માર્ગના જોખમોને કારણે મંગળવારે બપોરે આ ફ્લાઈટ અચાનક રદ કરી દેવામાં આવી હતી. આ સમાચાર મળતા જ ખેલાડીઓમાં ચિંતા ફેલાઈ ગઈ હતી. ખાસ કરીને વેસ્ટ ઇન્ડીઝના કોચ ડેરેન સેમીએ સોશિયલ મીડિયા પર પોતાની નારાજગી વ્યક્ત કરતા લખ્યું હતું કે, "મારે બસ હવે ઘરે જવું છે."
ICC ચેરમેન જય શાહની મધ્યસ્થી
પરિસ્થિતિ ગંભીર બનતા આંતરરાષ્ટ્રીય ક્રિકેટ કાઉન્સિલ (ICC) એ તાત્કાલિક પગલાં લીધા છે. ICC સૂત્રોના જણાવ્યા અનુસાર, ચેરમેન જય શાહે પોતે આ મામલે હસ્તક્ષેપ કર્યો છે. તેમણે ફસાયેલા ખેલાડીઓ સાથે વ્યક્તિગત રીતે વાત કરી છે અને તેમને સુરક્ષિત રીતે ઘરે પહોંચાડવાની ખાતરી આપી છે. હવે ICC એ દરેક ખેલાડી માટે અલગ-અલગ કોમર્શિયલ એરલાઇન્સમાં બુકિંગ કરાવવાની પ્રક્રિયા શરૂ કરી છે.
યુદ્ધની અસર ક્રિકેટ પર
ગલ્ફ ક્ષેત્રમાં ચાલી રહેલા સંઘર્ષને કારણે દુબઈ સ્થિત અમીરાત એરલાઇન્સ જેવી કંપનીઓ પોતાની સેવાઓ આપી શકતી નથી. વેસ્ટ ઇન્ડીઝની ટીમ 1 માર્ચથી કોલકાતામાં અટવાયેલી છે, જ્યારે દક્ષિણ આફ્રિકાના ખેલાડીઓ 4 માર્ચની સેમિફાઇનલ હાર્યા બાદ ઘરે જવા માટે રાહ જોઈ રહ્યા છે. હાલમાં વેસ્ટ ઇન્ડીઝના 12 અને દક્ષિણ આફ્રિકાના 12 જેટલા ખેલાડીઓ હજુ પણ ભારતમાં છે. જોકે, દક્ષિણ આફ્રિકાના કેશવ મહારાજ જેવા અમુક ખેલાડીઓ બીજી સિરીઝ માટે અન્ય રૂટથી રવાના થઈ શક્યા છે.