ચેન્નાઇ :પાંચ વખતની IPL ચેમ્પિયન ચેન્નઈ સુપર કિંગ્સે રવિવારે તેમના હોમ ગ્રાઉન્ડ, MA ચિદમ્બરમ સ્ટેડિયમ ખાતે એક ખાસ કાર્યક્રમનું આયોજન કર્યું હતું. ફ્રેન્ચાઇઝના દિગ્ગજ ખેલાડીઓ આ કાર્યક્રમમાં હાજર રહ્યા હતા. ટીમે સુરેશ રૈનાથી લઈને મેથ્યુ હેડન સુધીના તમામ દિગ્ગજોને આમંત્રણ આપ્યું હતું.

CSKએ તેના ભૂતપૂર્વ ખેલાડીઓનું સન્માન કરવા માટે આ કાર્યક્રમનું આયોજન કર્યું હતું અને તેનું નામ Roar 26 રાખ્યું હતું. આ કાર્યક્રમમાં ફક્ત ટીમના અનુભવી ખેલાડીઓ જ નહીં પરંતુ તાજેતરમાં T20 વર્લ્ડ કપ વિજેતા ભારતીય ટીમના ખેલાડીઓનું પણ સન્માન કરવામાં આવ્યું હતું, જેમાં સંજુ સેમસન અને શિવમ દુબેનો સમાવેશ થાય છે. રૈના અને હેડનને ફ્રેન્ચાઇઝીના પ્રથમ હોલ ઓફ ફેમમાં સામેલ કરવામાં આવ્યા હતા.
ટીમના અનુભવી ખેલાડીઓ એક પછી એક મેદાનમાં પ્રવેશ્યા અને દર્શકો દ્વારા તેમનું ઉષ્માભર્યું સ્વાગત કરવામાં આવ્યું. આમાં મુથૈયા મુરલીધરન, મેથ્યુ હેડન, માઈકલ હસી, ડ્વેન બ્રાવો, મુરલી વિજય, પાર્થિવ પટેલ, એસ. બદ્રીનાથ, અનિરુદ્ધ શ્રીકાંત, એલ. બાલાજી, સુરેશ રૈના અને હરભજન સિંહનો સમાવેશ થાય છે.

સુરેશ રૈના 2010ની IPL ટ્રોફી સાથે મેદાનમાં ઉતર્યો હતો, જે ટીમનો પહેલો ખિતાબ હતો. ત્યારબાદ હેડન 2011ની ચેમ્પિયન્સ લીગ ટ્રોફી લઈને આવ્યો હતો. મુરલી વિજય 2011ની IPL ટ્રોફી લઈને આવ્યો હતો. રૈના અને બ્રાવો 2014ની ચેમ્પિયન્સ લીગ ટ્રોફી લઈને આવ્યા હતા. અંબાતી રાયડુ 2018ની IPL ટ્રોફી લઈને મેદાનમાં ઉતર્યો હતો. બાલાજી 2021ની ટ્રોફી લઈને આવ્યો હતો, જ્યારે માઈક હસી જે હાલમાં ટીમના બેટિંગ કોચ છે તે 2023ની ટ્રોફી લઈને આવ્યો હતો.
આ ઇવેન્ટ દરમિયાન, વર્તમાન ટીમના ખેલાડીઓએ ભૂતપૂર્વ ખેલાડીઓ સામે મેચ રમી. બેટિંગ કરતી વખતે બ્રાવો સ્ટમ્પ થઈ ગયો હતો, પરંતુ ધોનીએ મજાકમાં તેને આઉટ કર્યો ન હતો. શિવમ દુબે હેડનને બોલિંગ કરતો જોવા મળ્યો હતો. ઇવેન્ટ દરમિયાન સુરેશ રૈનાએ પણ બેટિંગ કરી હતી.