શ્રીનગર : બેંગલુરુના ૩૩ વર્ષીય સ્ટાર ગોલ્ફર ખાલિન જોશીએ શ્રીનગરના નયનરમ્ય રોયલ સ્પ્રિંગ્સ ગોલ્ફ કોર્સ ખાતે રમાયેલી ₹૧ કરોડની ઇનામી રકમ ધરાવતી 'J&K ઓપન ૨૦૨૬' ગોલ્ફ ટુર્નામેન્ટમાં પોતાનું એકચક્રી શાસન જમાવ્યું છે. અંતિમ રાઉન્ડમાં પાંચ-અંડર ૬૬ નો સ્કૉર કરીને ખાલિન જોશીએ નજીકના હરીફને ૯ શોટના વિશાળ માર્જિનથી પછાડીને શાનદાર વિજય મેળવ્યો હતો. તેણે આ ટુર્નામેન્ટ કુલ ૨૪-અંડર ૨૬૦ ના સ્કોર સાથે પૂર્ણ કરીને પોતાના કરિયરનું ૮મું પ્રોફેશનલ ટાઇટલ અને ૨૦૨૬ની વર્તમાન સિઝનની બીજી મોટી જીત નોંધાવી છે.

આ ભવ્ય વિજય સાથે ખાલિન જોશીને ₹૧૫ લાખનો વિજેતા ચેક એનાયત કરવામાં આવ્યો હતો, જેનાથી DP વર્લ્ડ PGTI રેન્કિંગમાં તે ૧૩મા સ્થાનેથી સીધો આઠમા સ્થાને પહોંચી ગયો છે. જોશીએ આખા અઠવાડિયા દરમિયાન અદ્ભુત ધૈર્ય અને ચોકસાઈ દર્શાવી હતી અને સતત ૫૫ હોલ સુધી એક પણ બોગી વિના રમત રમી હતી. તેણે સમગ્ર ૭૨ હોલની રમતમાં માત્ર એક જ બોગી કરી હતી. દિલ્હીના અનુભવી ગોલ્ફર રાશિદ ખાને ૧૫-અંડર ૨૬૯ સાથે બીજું સ્થાન મેળવ્યું હતું, જ્યારે પાણીપતના શુભમ જગલાને ૧૪-અંડર ૨૭૦ સાથે ત્રીજું સ્થાન પ્રાપ્ત કર્યું હતું.

જીત બાદ ખુશી વ્યક્ત કરતા ખાલિન જોશીએ જણાવ્યું કે, "શરૂઆતમાં પ્રથમ ફેરવે ચૂકી ગયા બાદ હું થોડો નર્વસ હતો, પરંતુ ત્રીજા અને ચોથા હોલ પર સતત બર્ડી બનાવ્યા બાદ મારો આત્મવિશ્વાસ પાછો આવ્યો હતો." તેણે શ્રીનગરના રોયલ સ્પ્રિંગ્સ ગોલ્ફ કોર્સની સુંદરતા અને વ્યવસ્થાપનની ભારે પ્રશંસા કરી હતી. જોશીએ ઉમેર્યું કે જમ્મુ અને કાશ્મીરમાં ગોલ્ફ ટૂરિઝમ અને સ્થાનિક ખેલાડીઓ માટે અપાર શક્યતાઓ રહેલી છે. J&K ટૂરિઝમ અને ડીપી વર્લ્ડના સહયોગથી યોજાયેલી આ સફળ સ્પર્ધાએ પ્રદેશમાં આંતરરાષ્ટ્રીય કક્ષાની રમતગમત ઇવેન્ટ્સ આયોજિત કરવાનો માર્ગ વધુ મોકળો કર્યો છે.