​લંડન: ​વિશ્વની સૌથી લોકપ્રિય ફૂટબોલ ટૂર્નામેન્ટ ઇંગ્લિશ પ્રીમિયર લીગની નવી સિઝનનો ધમાકેદાર પ્રારંભ થઈ રહ્યો છે, જેમાં ડિફેન્ડિંગ ચેમ્પિયન આર્સેનલ પોતાનો ખિતાબ જાળવી રાખવાના મજબૂત દાવેદાર તરીકે મેદાનમાં ઉતરશે. ૨૨ વર્ષના લાંબા વિરામ બાદ ગત સત્રમાં ચેમ્પિયન બનેલી આર્સેનલની ટીમ આ વખતે પણ મજબૂત માનસિકતા સાથે ઉતરી રહી છે, જ્યારે તેમની હરીફ ક્લબોમાં મોટાપાયે મેનેજર અને ખેલાડીઓના ફેરબદલ થતાં સમગ્ર લીગમાં એક નવા યુગનો સૂર્યોદય થયો છે.

​મિકેલ આર્ટેટાના માર્ગદર્શન હેઠળ રમી રહેલી આર્સેનલે પોતાના મિડફિલ્ડને વધુ મજબૂત કરવા માટે ન્યૂકેસલ યુનાઇટેડના પૂર્વ સુકાની બ્રુનો ગુઇમારેસને પોતાની ટીમમાં સામેલ કર્યો છે. તાજેતરમાં જ યોજાયેલી એફએ કમ્યુનિટી શિલ્ડની ફાઇનલમાં આર્સેનલે માન્ચેસ્ટર સિટીને ૩-૦થી માત આપીને પોતાના તેવર સ્પષ્ટ કરી દીધા હતા. તાજેતરના આ શાનદાર પ્રદર્શનને પગલે આર્સેનલના ખેલાડીઓનો આત્મવિશ્વાસ ચરમસીમાએ છે. આર્સેનલ પોતાના ઘરંગણે અમીરાત સ્ટેડિયમ ખાતે નવી પ્રમોટ થયેલી કોવેન્ટ્રી સિટી સામેથી પોતાની ટાઇટલ ડિફેન્સ ઝુંબેશનો પ્રારંભ કરશે.

​બીજી તરફ, ઇંગ્લિશ પ્રીમિયર લીગની અન્ય મુખ્ય દાવેદાર ક્લબોમાં ધરખમ પરિવર્તનો જોવા મળી રહ્યા છે. રેકોર્ડ નવ ક્લબો આ વખતે નવા કાયમી મેનેજર સાથે મેદાનમાં ઉતરી રહી છે. પેપ ગ્વાર્ડિઓલાના યુગના અંત બાદ માન્ચેસ્ટર સિટીમાં એન્ઝો મારેસ્કાએ કમાન સંભાળી છે. જોકે, કમ્યુનિટી શિલ્ડની હાર બાદ માન્ચેસ્ટર સિટી અને તેમના નવા મેનેજર પર સવાલો ઊભા થયા છે અને તેમને બોર્નમાઉથ સામેની પ્રથમ મેચમાં જ આલોચકોને જવાબ આપવો પડશે. લિવરપૂલમાં પણ નવો દોર શરૂ થયો છે, જ્યાં એન્ડોની ઇરાઓલાના હાથમાં ટીમનું સુકાન સોંપાયું છે અને મોહમ્મદ સાલાહની ગેરહાજરીમાં લિવરપૂલ પોતાની પ્રથમ મેચ ન્યૂકેસલ યુનાઇટેડ સામે રમશે.

​ન્યૂકેસલ માટે આ ટ્રાન્સફર વિન્ડો ઘણી ઉથલપાથલ ભરેલી રહી છે, જ્યાં તેમના મુખ્ય ખેલાડીઓ ગુઇમારેસ, ટોનાલી અને એન્થોની ગોર્ડન અન્ય ક્લબોમાં જોડાયા છે અને નવા કોચ મિચિયસ જાયસલે ટીમને પુનઃગઠિત કરવાનો પડકાર ઝીલી રહ્યા છે. ચેલ્સીએ પણ ચાહકોની અપેક્ષાઓ પૂરી કરવા માટે ઝાબી એલોન્સોને મેનેજર તરીકે નિયુક્ત કરીને મોટો દાવ ખેલ્યો છે, તેમજ ઓલ-ટાઇમ રેકોર્ડ ટ્રાન્સફર ફી સાથે મોર્ગન રોજર્સને ટીમમાં સામેલ કર્યો છે.

​માન્ચેસ્ટર યુનાઇટેડ માઇકલ કારિકના નેતૃત્વમાં અને યુરી ટાઇલેમેન્સ જેવા સ્ટાર મિડફિલ્ડરના આગમન સાથે હલ સિટી સામે પોતાની સફર શરૂ કરશે. ટ્રાન્સફર માર્કેટમાં અબજો રૂપિયાના ખર્ચે થયેલા આદાન-પ્રદાન અને દિગ્ગજ ચેહરાઓના ફેરબદલ વચ્ચે, નવ મહિના સુધી ચાલનારા આ ફૂટબોલ મહાકુંભમાં આર્સેનલ પોતાનો તાજ બચાવી રાખે છે કે પછી કોઈ નવી ટીમ લીગ પર કબજો જમાવે છે તેના પર સમગ્ર વિશ્વના ફૂટબોલ પ્રેમીઓની નજર રહેશે.