તિરુવનન્તપુરમ : ક્રિકેટપ્રેમીઓ માટે રવિવારનો દિવસ અત્યંત રોમાંચક બની રહેવાનો છે. ભારત અને વેસ્ટ ઇન્ડિઝ વચ્ચે ત્રણ વન-ડે મેચોની શ્રેણીની પ્રથમ મેચ રવિવારે બપોરે 2.00 વાગ્યાથી તિરુવનન્તપુરમ ખાતે રમાશે. આ મેચ સાથે જ ક્રિકેટ ચાહકોને ફરી એકવાર 'રો-કો' એટલે કે રોહિત શર્મા અને વિરાટ કોહલીની સુપરહિટ જોડીની તોફાની બેટિંગ અને આતશબાજી જોવાનો અદ્ભુત મોકો મળશે.

બંને દિગ્ગજ ખેલાડીઓ હવે આંતરરાષ્ટ્રીય સ્તરે ટી-20 માંથી નિવૃત્તિ લઈ ચૂક્યા હોવાથી માત્ર વન-ડે ફોર્મેટ અને આઈપીએલમાં જ રમતા જોવા મળે છે. આગામી સમયમાં તેમની રમત મર્યાદિત રહેવાની શક્યતા હોવાથી સ્ટેડિયમ હોય કે ટીવીનો પડદો, ચાહકો આ બેટિંગ લેજન્ડ્સને રમતા જોવાનો એક પણ મોકો છોડવા માંગતા નથી. મેચના ઉત્સાહ વચ્ચે તિરુવનન્તપુરમના ગ્રીનફીલ્ડ ઇન્ટરનેશનલ સ્ટેડિયમની બહાર કેપ્ટન રોહિત શર્માનું વિશાળકાય કટઆઉટ પણ લગાડવામાં આવ્યું છે.

શાઇ હોપની કેરેબિયન ટીમ સામેની આ શ્રેણીમાં હાર્દિક પંડ્યા, જસપ્રીત બુમરાહ અને શ્રેયસ અય્યર જેવા સિનિયર ખેલાડીઓને આરામ આપવામાં આવ્યો છે. શુભમન ગિલના નેતૃત્વમાં યશસ્વી જેસવાલ, રૂતુરાજ ગાયકવાડ, કે.એલ. રાહુલ, રવિન્દ્ર જાડેજા, ધ્રુવ જુરેલ, નીતીશ રેડ્ડી, નમન ધીર, કુલદીપ યાદવ અને મોહમ્મદ સિરાજ જેવા યુવા અને અનુભવી ખેલાડીઓની ફોજ મેદાનમાં ઉતરશે. ટીમ ઈન્ડિયાના મુખ્ય કોચ ગૌતમ ગંભીર આ શ્રેણીમાં ટીમ સાથે ઉપસ્થિત રહેશે, જ્યારે બીજી તરફ જાપાનમાં યોજાનાર એશિયન ગેમ્સમાં શ્રેયસ અય્યરની કેપ્ટનશીપ અને વીવીએસ લક્ષ્મણના માર્ગદર્શન હેઠળ ભારતની ટી-20 ટીમ ભાગ લેશે.