નવી દિલ્હી:  રાજધાની દિલ્હીના પ્રતિષ્ઠિત અરૂણ જેટલી ક્રિકેટ સ્ટેડિયમ ખાતે ભારત અને અફઘાનિસ્તાન વચ્ચે યોજાનારા ટી-૨૦ ક્રિકેટ મેચને ધ્યાનમાં રાખીને દિલ્હી ટ્રાફિક પોલીસે વ્યાપક એડવાઇઝરી જાહેર કરી છે. મેચ જોવા આવતા હજારો ક્રિકેટ રસિકોની ભીડ અને સુરક્ષા વ્યવસ્થાને પગલે આજે મધ્ય દિલ્હીના અનેક મહત્વના રસ્તાઓ પર ટ્રાફિક ખોરવાઈ જવાની કે ડાયવર્ટ કરવાની સ્થિતિ સર્જાશે. આ પરિસ્થિતિને જોતા પોલીસે સામાન્ય વાહનચાલકોને યોગ્ય આયોજન કરીને જ ઘરની બહાર નીકળવા અને વૈકલ્પિક માર્ગો પસંદ કરવા સૂચના આપી છે.

ટ્રાફિક પોલીસ દ્વારા આપવામાં આવેલી માહિતી અનુસાર, બપોરે ૨:૦૦ વાગ્યાથી લઈને રાતના ૧૧:૪૫ વાગ્યા સુધી સ્ટેડિયમની આસપાસના વિસ્તારોમાં ટ્રાફિક ડાયવર્ઝન અને વાહન નિયંત્રણો અમલમાં રહેશે. ખાસ કરીને બહાદુર શાહ ઝફર માર્ગ, જવાહરલાલ નેહરુ (JLN) માર્ગ, આસફ અલી રોડ અને દિનદયાળ ઉપાધ્યાય (DDU) માર્ગ પર વાહનોની અવરજવર પર પ્રતિબંધ અથવા આંશિક નિયંત્રણો રહેશે. આ ઉપરાંત, ભારે અને માલવાહક વાહનોના પ્રવેશ પર પણ આ માર્ગો પર રોક લગાવવામાં આવી છે.

મેચ જોવા આવતા પ્રેક્ષકો માટે એન્ટ્રી ગેટ મુજબ અલગ-અલગ રસ્તાઓ નક્કી કરવામાં આવ્યા છે. ગેટ નં. ૧ થી ૮ સુધી પહોંચવા માટે બહાદુર શાહ ઝફર માર્ગ, ગેટ નં. ૧૦ થી ૧૫ માટે જેએલએન માર્ગ અને ગેટ નં. ૧૬ થી ૧૮ માટે પેટ્રોલ પંપ નજીકનો માર્ગ નક્કી કરાયો છે. સ્ટેડિયમ નજીક સામાન્ય વાહનો માટે કોઈ પાર્કિંગ ઉપલબ્ધ રહેશે નહીં, માત્ર માન્ય પાસ ધરાવતા વાહનોને જ પ્રવેશ મળશે. દર્શકો માટે માતા સુંદરી રોડ, રાજઘાટ પાવર હાઉસ રોડ અને વેલોડ્રોમ રોડ ખાતે ‘પાર્ક એન્ડ રાઇડ’ તથા મફત પાર્કિંગની વ્યવસ્થા કરવામાં આવી છે. વાહનચાલકોને દિલ્હી મેટ્રોનો મહત્તમ ઉપયોગ કરવા અને જામથી બચવા માટે ટ્રાફિક નિયમોનું કડક પાલન કરવા જણાવાયું છે.