ટોક્યો, તા.૨૨: એશિયન ગેમ્સ ૨૦૨૬માં ભારતીય પુરુષ બેડમિન્ટન ટીમે પોતાના અદ્ભુત અને મનોબળ પ્રદર્શનથી રચાયેલા ઈતિહાસને આગળ વધાર્યો છે. ક્વાર્ટરફાઈનલના હાઈ-વોલ્ટેજ મુકાબલામાં યજમાન જાપાનને તેના જ ઘરઆંગણે ૩-૦થી ભવ્ય મ્હાત આપીને ભારતે સેમીફાઈનલમાં પ્રવેશ કરી લીધો છે. આ સાથે જ ભારતીય બેડમિન્ટન ટીમે દેશ માટે વધુ એક મેડલ પાકો કરી લીધો છે.

આ શ્રેષ્ઠ જીતમાં ભારતના સ્ટાર શટલર લક્ષ્ય સેને મુખ્ય ભૂમિકા ભજવી હતી. તાજેતરના સમયમાં ખરાબ ફોર્મ અને દબાણનો સામનો કરી રહેલા લક્ષ્ય સેને જાપાનના વિશ્વના ૭મા ક્રમાંકિત ખેલાડી કોડાઈ નારાઓકા સામે રમાયેલી રોમાંચક મેચમાં અકલ્પનીય વાપસી કરી હતી. પ્રથમ ગેમ ૧૧-૨૧થી ગુમાવ્યા બાદ સેને બીજી ગેમ ૨૧-૫થી જીતીને વાપસી કરી હતી. નિર્ણાયક ગેમમાં નારાઓકા ૧૯-૧૪થી આગળ હતો અને ભારત પર હારનું સંકટ ઘેરાયું હતું, ત્યારે લક્ષ્ય સેને અદ્ભુત સંયમ બતાવી સતત ૭ પોઈન્ટ જીત્યા હતા અને ૧૧-૨૧, ૨૧-૫, ૨૧-૧૯થી યાદગાર જીત મેળવી ભારતને ૧-૦ની સરસાઈ અપાવી હતી.

સાત્વિક-ચિરાગ અને આયુષ શેટ્ટીની વિજયી હેટ્રિક

લક્ષ્ય સેનના વિજય બાદ કોર્ટ પર ઉતરેલી ભારતની સુપરહિટ ડબલ્સ જોડી સાત્વિકસાઈરાજ રંકીરેડ્ડી અને ચિરાગ શેટ્ટીએ પોતાનો દબદબો જાળવી રાખ્યો હતો. તેમણે જાપાનના પૂર્વ વર્લ્ડ ચેમ્પિયન હોકી તાકુરો અને કોબાયાશી યુગો સામે મજબૂત રમત રજૂ કરતાં ૨૧-૧૮, ૨૪-૨૨થી સીધી ગેમ્સમાં વિજય મેળવીને ભારતની સરસાઈ ૨-૦ કરી દીધી હતી.

ત્યારબાદ ત્રીજી મેચમાં યુવા ખેલાડી આયુષ શેટ્ટીએ ભારતીય વિજય પર આખરી મહોર મારી હતી. બેડમિન્ટન એશિયા ચેમ્પિયનશિપના ફાઇનલિસ્ટ આયુષે વિશ્વના ૧૬મા ક્રમાંકિત કોકી વાતાનાબેને ૨૧-૧૦, ૨૧-૧૯થી ધૂળ ચાટતી કરીને ભારતને ૩-૦થી અજેય જીત અપાવી હતી. ગત એશિયન ગેમ્સમાં સિલ્વર મેડલ જીતનારી ભારતીય પુરુષ ટીમ હવે બુધવારે રમાનારી સેમીફાઈનલમાં ગોલ્ડ મેડલ પર નિશાન સાધવાના ઈરાદા સાથે કોર્ટમાં ઉતરશે.