બેંગલુરુ: ઈન્ડિયન પ્રીમિયર લીગ (IPL) 2026 ની રોમાંચક પ્લેઓફ મેચો શરૂ થાય તે પહેલાં રોયલ ચેલેન્જર્સ બેંગલોર (RCB) ના કેમ્પમાંથી ખૂબ જ નિરાશાજનક સમાચાર સામે આવ્યા છે. ટીમનો મહત્વનો ઇંગ્લિશ ઓલરાઉન્ડર જેકબ બેથેલ આંગળીની ગંભીર ઈજાને કારણે IPL ની બાકીની મેચોમાંથી બહાર થઈ ગયો છે અને તે સારવાર માટે યુકે પરત ફર્યો છે. IPL પ્લેઓફ જેવી નિર્ણાયક ક્ષણોમાં બેથેલ જેવા ખેલાડીની ગેરહાજરી RCB માટે મોટો ઝટકો સાબિત થઈ શકે છે.

ઈંગ્લેન્ડ અને વેલ્સ ક્રિકેટ બોર્ડ (ECB) એ સત્તાવાર પુષ્ટિ કરી છે કે જેકબ બેથેલને IPL દરમિયાન ડાબી રિંગ ફિંગરમાં ઈજા થઈ હતી. તેની સ્થિતિને જોતા તેને તાત્કાલિક મેડિકલ દેખરેખ હેઠળ લાવવો જરૂરી હોવાથી તે સ્વદેશ પાછો ફર્યો છે. ઉલ્લેખનીય છે કે, 4 જૂનથી લોર્ડ્સના ઐતિહાસિક મેદાન પર ન્યુઝીલેન્ડ સામે શરૂ થતી પ્રથમ ટેસ્ટ શ્રેણી માટે બેથેલની ઉપલબ્ધતા અત્યંત જરૂરી છે, તેથી ઈંગ્લેન્ડની મેન્સ મેડિકલ ટીમ હવે તેનું સંપૂર્ણ મૂલ્યાંકન કરશે.

RCB ના અભિયાન પર અસર:

આ સિઝનમાં જેકબ બેથેલે ૭ મેચ રમી હતી જેમાં તેણે ૯૬ રન બનાવ્યા હતા. ફિલ સોલ્ટની ઈજા બાદ ટીમમાં સામેલ થયેલા બેથેલના આ રીતે બહાર થવાથી RCB ની બેટિંગ લાઇનઅપમાં ખાલીપો સર્જાયો છે. જોકે, તેના ગયા બાદ વેંકટેશ ઐયરને ઓપનિંગમાં ફરી તક મળી છે, જેણે છેલ્લી મેચમાં ૪૪ રન ફટકારીને આત્મવિશ્વાસ દાખવ્યો છે. ટીમ મેનેજમેન્ટ હવે પ્લેઓફમાં તેના વગર કેવી રીતે રણનીતિ ઘડે છે, તે જોવું રસપ્રદ રહેશે.

ઈંગ્લેન્ડ માટે મહત્વપૂર્ણ ટેસ્ટ શ્રેણી

બેથેલનું ઝડપથી સાજા થવું ઈંગ્લેન્ડની ટીમ માટે પણ એટલું જ મહત્વનું છે જેટલું RCB માટે પ્લેઓફ જીતવું. ECB એ આ અંગે સ્પષ્ટતા કરી છે કે ખેલાડીની સુરક્ષા અને આગામી ટેસ્ટ મેચોને ધ્યાનમાં રાખીને જ આ નિર્ણય લેવામાં આવ્યો છે. જેકબ બેથેલના પરત ફર્યા બાદ તેનું ફિટનેસ ટેસ્ટ કરવામાં આવશે, જેના આધારે જ તે ન્યુઝીલેન્ડ સામેના પ્રથમ ટેસ્ટમાં રમી શકશે કે કેમ તે નક્કી થશે. ચાહકો હવે આશા રાખી રહ્યા છે કે તેમના પ્રિય ખેલાડીની ગેરહાજરી છતાં RCB પ્લેઓફમાં શાનદાર પ્રદર્શન કરશે.