નવી દિલ્હી — તા.૦૩ ૧૫ ઓગસ્ટથી શ્રીલંકા સામે શરૂ થઈ રહેલી બે મહત્વપૂર્ણ ટેસ્ટ મેચોની શ્રેણી પહેલા ભારતીય ક્રિકેટ ટીમને એક પછી એક મોટા ઝાટકા લાગ્યા છે. ઈજાના કારણે ટીમ ઈન્ડિયાના ચાર મુખ્ય અને મેચ-વિનર ખેલાડીઓ શ્રેણીમાંથી બહાર ફેંકાઈ ગયા છે, જ્યારે પાંચમા ખેલાડીની રમવા અંગે પણ અનિશ્ચિતતા સેવાઈ રહી છે. આટલા બધા સ્ટાર ખેલાડીઓની ગેરહાજરીમાં કપ્તાન શુભમન ગિલ માટે શ્રીલંકાની ધરતી પર ટેસ્ટ શ્રેણી જીતવી અત્યંત પડકારજનક બની રહેશે.
શ્રીલંકા સામેની આ શ્રેણી ભારત માટે વર્લ્ડ ટેસ્ટ ચેમ્પિયનશિપ (WTC) ની ફાઇનલની દોડમાં બન્યા રહેવા માટે ખૂબ જ મહત્વપૂર્ણ છે. જોકે, મેચ શરૂ થાય તે પહેલા જ ભારતીય ટીમ બોલિંગ અને ઓલરાઉન્ડ ક્ષેત્રે નબળી પડી ગઈ છે. ઝડપી બોલિંગના અગ્રેસર જસપ્રીત બુમરાહ ઈજાના કારણે આ શ્રેણી ગુમાવશે, જેના સ્થાને યુવા બોલર આકિબ નબી ડારનો સમાવેશ કરવામાં આવ્યો છે. આ ઉપરાંત, જાંઘના સ્નાયુ ખેંચાઈ જવાને કારણે ઓલરાઉન્ડર નીતિશ કુમાર રેડ્ડી, પગની ઈજાના કારણે વોશિંગ્ટન સુંદર અને ઓલરાઉન્ડર હર્ષિત રાણા પણ ટીમમાંથી બહાર થઈ ગયા છે.
ભારતીય ટીમની ચિંતામાં વધારો કરતાં, બીસીસીઆઈ દ્વારા જાહેર કરાયેલી અપડેટ સ્ક્વોડમાં બેટ્સમેન સાઈ સુદર્શનના નામ આગળ એસ્ટરિસ્ક (*) મૂકવામાં આવ્યો છે, જે દર્શાવે છે કે તેમનો સમાવેશ ફિટનેસ ટેસ્ટ પર આધારિત રહેશે. જો સાઈ પણ અયોગ્ય ઠરશે તો તે ભારત માટે પાંચમો મોટો આંચકો સાબિત થશે.
ભારત અને શ્રીલંકા વચ્ચે પહેલી ટેસ્ટ મેચ ૧૫ થી ૧૯ ઓગસ્ટ અને બીજી ટેસ્ટ ૨૩ થી ૨૭ ઓગસ્ટ દરમિયાન રમાશે. આ અગાઉ બંને ટીમો વચ્ચે ૭ થી ૯ ઓગસ્ટ દરમિયાન ત્રણ દિવસીય પ્રી-સિરીઝ પ્રેક્ટિસ મેચ યોજાશે. હવે તમામની નજરો રવિન્દ્ર જાડેજા, મોહમ્મદ સિરાજ અને કુલદીપ યાદવ જેવા અનુભવી ખેલાડીઓ પર રહેશે કે તેઓ આ યુવા ટીમ સાથે મળીને શ્રીલંકાને માત આપી શકે છે કે કેમ.