મુંબઈ: ભારતીય ક્રિકેટના આઈકોન વિરાટ કોહલી હંમેશા મેદાન પરના પોતાના પ્રદર્શન માટે ચર્ચામાં રહે છે, પરંતુ તાજેતરમાં જર્મન મોડલ અને પ્રભાવશાળી લિઝલેઝ (LizLez) સાથે જોડાયેલા એક વિવાદે સોશિયલ મીડિયા પર ભારે ગરમાવો લાવી દીધો છે. આ વિવાદ ત્યારે શરૂ થયો જ્યારે કોહલીએ ભૂલથી લિઝલેઝની એક તસવીર લાઈક કરી અને તરત જ તેને અનલાઈક (Unlike) કરી દીધી. જોકે, આ નાની એવી ઘટના બાદ લિઝલેઝે જે ઘટસ્ફોટ કર્યો છે તેણે હવે સૌને ચોંકાવી દીધા છે.

બદનામ કરવાનું મોટું કાવતરું?

લિઝલેઝે તાજેતરમાં એક ઇન્ટરવ્યુમાં દાવો કર્યો છે કે વિરાટ કોહલીના 'લાઈક' વિવાદ બાદ તેને અનેક મેગેઝિન અને પત્રકારોના ફોન આવ્યા હતા. લિઝલેઝના જણાવ્યા અનુસાર, કેટલાક લોકોએ તેને વિરાટ કોહલી પર ખોટા અને અયોગ્ય આરોપો લગાવવા માટે મોટી રકમના પૈસાની ઓફર કરી હતી. લિઝલેઝે કહ્યું, "કેટલાક પત્રકારોએ મને એવી વાતો કહેવા દબાણ કર્યું જે મેં ક્યારેય અનુભવી નથી. તેમણે મને કોહલી વિરુદ્ધ આરોપ લગાવવા પૈસાની ઓફર કરી, પણ હું આવું કેમ કરું? વિરાટ મારો ફેવરિટ ક્રિકેટર છે અને હું પૈસા માટે કોઈની છબી બગાડવા માંગતી નથી."

AI ફોટા અને મીમ્સનું પૂર

સોશિયલ મીડિયા પર નેટીઝન્સે આ ઘટના બાદ વિરાટ અને લિઝલેઝના અનેક AI-જનરેટેડ (કૃત્રિમ બુદ્ધિથી બનેલા) ફોટા વાયરલ કર્યા છે. આ અંગે પ્રતિક્રિયા આપતા મોડલે હસતા હસતા કહ્યું કે, "મારા માટે આ બધું રમુજી છે, પરંતુ વિરાટ માટે કદાચ આ સારું નથી. તેણે કંઈ જ અયોગ્ય કર્યું નથી, આ માત્ર એક ટેકનિકલ ભૂલ હોઈ શકે છે."

જૂના વિવાદોની યાદ તાજી થઈ

આ અગાઉ ૨૦૨૫માં પણ વિરાટ કોહલી જ્યારે અભિનેત્રી અવનીત કૌરની તસવીર લાઈક કરવા બદલ ટ્રોલ થયો હતો ત્યારે તેણે સ્પષ્ટતા કરી હતી કે ફીડ સાફ કરતી વખતે અલ્ગોરિધમની ભૂલને કારણે આવું થયું હતું. લિઝલેઝના આ લેટેસ્ટ ખુલાસાએ સાબિત કરી દીધું છે કે સોશિયલ મીડિયા પર સેલિબ્રિટીઝને નિશાન બનાવવા માટે કેવા પ્રકારના પેઇડ (પૈસા આપીને કરાતા) કેમ્પેઈન ચલાવવામાં આવે છે.

હાલમાં વિરાટ કોહલી તરફથી આ ખુલાસા અંગે કોઈ સત્તાવાર નિવેદન આવ્યું નથી, પરંતુ લિઝલેઝની પ્રામાણિકતાની પ્રશંસકો સોશિયલ મીડિયા પર ભારે પ્રશંસા કરી રહ્યા છે.