ગૌહાટીઃ ભારત અને વેસ્‍ટ ઇન્‍ડિઝ વચ્‍ચેની બીજી વનડે મેચ ક્રિકેટના ઇતિહાસમાં યાદગાર બની ગઈ. ગૌહાટીમાં રમાયેલી આ મેચમાં બેટરોનો એવો જલવો જોવા મળ્‍યો કે બંને ટીમોના સ્‍કોર મળીને કુલ ૮૧૧ રન થયા. રનોની આ ઐતિહાસિક રનવર્ષામાં ભારતે વેસ્‍ટ ઇન્‍ડિઝને ૮ વિકેટે હરાવીને શ્રેણીમાં પણ દબદબો જાળવી રાખ્‍યો.

પ્રથમ બેટિંગ કરવા ઉતરેલી વેસ્‍ટ ઇન્‍ડિઝની ટીમે ૫૦ ઓવરમાં ૪૦૫ રનનો વિશાળ સ્‍કોર ખડકયો. વિન્‍ડિઝ તરફથી જ્‍હોન કેમ્‍પબેલ, શાઈ હોપ અને અમીર જાંગૂએ સદી ફટકારીને ભારતીય બોલરો સામે ધમાકેદાર બેટિંગ કરી.

૪૦૬ રનના વિશાળ લક્ષ્યાંકનો પીછો કરવા ઉતરેલી ટીમ ઇન્‍ડિયાએ શરૂઆતથી જ વિસ્‍ફોટક બેટિંગ કરી. રોહિત શર્માએ શાનદાર સદી ફટકારી ભારતને મજબૂત શરૂઆત અપાવી, જ્‍યારે કેપ્‍ટન શુભમન ગિલે ૨૨૩ રનની અણનમ બેવડી સદી ફટકારીને મેચને એકતરફી બનાવી દીધી.

ગિલે મેદાનની ચારે તરફ આક્રમક શોટ્‍સ ફટકારીને વિન્‍ડિઝના બોલરોની ધુલાઈ કરી હતી. તેની ઐતિહાસિક ઇનિંગ્‍સના જોરે ભારતે ૪૩.૩ ઓવરમાં ૪૦૬ રન બનાવી લક્ષ્યાંક હાંસલ કરી લીધો. ભારતે માત્ર બે વિકેટ ગુમાવીને વિન્‍ડિઝના વિશાળ સ્‍કોરને પણ વામણો સાબિત કરી દીધો.

આ મેચની સૌથી મોટી ખાસિયત એ રહી કે એક જ વનડેમાં પાંચ બેટરોએ સદી ફટકારી. વિન્‍ડિઝ તરફથી ત્રણ અને ભારત તરફથી બે બેટરોની સદી સાથે મેચમાં રેકોર્ડનો વરસાદ થયો. કુલ ૮૧૧ રનના આ મુકાબલાએ વનડે ક્રિકેટની રેકોર્ડબુકમાં પણ પોતાનું સ્‍થાન બનાવી લીધું.