ટોકિયો : સાત સમંદર પાર જાપાનના નાગોયા ખાતે યોજાયેલી ૨૦મી એશિયન ગેમ્સમાં હિમાચલ પ્રદેશના ચંબા જિલ્લાના એક નાનકડા ગામની ૨૫ વર્ષીય ધાવિકા સીમા કુમારીએ ઈતિહાસ રચી દીધો છે. મહિલાઓની ૧૦,૦૦૦ મીટરની અત્યંત કપરી દોડમાં બ્રોન્ઝ મેડલ જીતીને સીમાએ ૨૦૧૦ પછી આ ઈવેન્ટમાં ભારતને પોડિયમ ફિનિશ અપાવીને ૧૬ વર્ષનો લાંબો દુકાળ ખતમ કર્યો છે. જોકે, આ ઐતિહાસિક મેડલ પાછળ એક અત્યંત ભાવુક અને સંઘર્ષપૂર્ણ કહાની છુપાયેલી છે.

૭૮ વર્ષીય માતાથી છુપાવી રાખ્યો જાપાન પ્રવાસ

મેડલ જીત્યા બાદ અત્યંત ભાવુક બનેલી સીમાએ ખુલાસો કર્યો હતો કે, તેણે જાપાન રમવા જવાની વાત પોતાની ૭૮ વર્ષની વૃદ્ધ અને હાઈ બ્લડ પ્રેશરથી પીડાતી માતાથી છુપાવી રાખી હતી. ૧૨ વર્ષની ઉંમરે પિતા છીનવાઈ ગયા બાદ માતાએ જ તેનો ઉછેર કર્યો છે. સીમા જાણતી હતી કે જો માતાને ખબર પડશે કે તે આટલી મોટી સ્પર્ધા માટે વિદેશ જઈ રહી છે તો તેઓ ટેન્શનમાં આવી જશે અને આખી રાત ઊંઘી શકાશે નહીં. આથી તેણે માતાને એમ જ કહ્યું હતું કે તે બેંગલુરુમાં ટ્રેનિંગ કેમ્પમાં જઈ રહી છે. માત્ર તેની મોટી બહેનને જ આ રહસ્યની જાણ હતી.

ઉઘાડા પગે પશુઓ ચરાવવાથી લઈને એશિયન ગેમ્સના પોડિયમ સુધીની સફર

સીમાની એથ્લેટ બનવાની સફર ભારે વિટંબણાઓથી ભરેલી રહી છે. બાળપણમાં પગરખાં (શૂઝ) પણ ન હોવાથી તે ગામડાના પહાડી રસ્તાઓ પર ઉઘાડા પગે દોડતી અને પશુઓ ચરાવતી હતી. જ્યારે તેણે એથ્લેટિક્સમાં કરિયર બનાવવાનું નક્કી કર્યું ત્યારે લોકોએ અનેક સવાલો ઉઠાવ્યા હતા, પરંતુ માતાએ હંમેશાં તેને સાથ આપ્યો હતો. આ સ્પર્ધામાં ૧૦,૦૦૦ મીટરમાં બ્રોન્ઝ જીતનારી તે ભારતની ત્રીજી ખેલાડી બની છે. હવે સીમાની નજર ૨૮મી સપ્ટેમ્બરે યોજાનારી ૫૦૦૦ મીટરની રેસમાં ભારત માટે ગોલ્ડ મેડલ જીતવા પર ટકેલી છે.