જયપુર:  IPL 2026ની સીઝન અત્યારે રનનો એવો વરસાદ જોઈ રહી છે કે બોલરો માટે મેદાનમાં ટકી રહેવું મુશ્કેલ બની ગયું છે. આ સીઝનમાં સૌથી વધુ ચર્ચા જો કોઈની થતી હોય તો તે છે માત્ર ૧૫ વર્ષનો ઉભરતો સિતારો વૈભવ સૂર્યવંશી. રાજસ્થાન રોયલ્સ તરફથી રમતા આ કિશોરે ક્રિકેટ જગતમાં ખળભળાટ મચાવી દીધો છે. તેણે ચેન્નાઈ સુપર કિંગ્સ  સામે પોતાની ડેબ્યૂ મેચમાં જ માત્ર ૧૫ બોલમાં તોફાની અડધી સદી ફટકારીને ઈતિહાસ રચી દીધો હતો. આટલેથી ન અટકતા, ૧૦ એપ્રિલે રોયલ ચેલેન્જર્સ બેંગ્લોર (RCB) સામે પણ તેણે ફરીથી ૧૫ બોલમાં જ ફિફ્ટી ફટકારીને સાબિત કરી દીધું કે તે આ સીઝનનો સૌથી મોટો 'ગેમ ચેન્જર' છે.

આ યાદીમાં માત્ર વૈભવ જ નહીં, પરંતુ અન્ય યુવા ખેલાડીઓ પણ પોતાની તાકાત બતાવી રહ્યા છે. પંજાબ કિંગ્સના પ્રિયાંશ આર્યએ સનરાઇઝર્સ હૈદરાબાદ સામે માત્ર ૧૬ બોલમાં અડધી સદી ફટકારીને ત્રીજું સ્થાન મેળવ્યું છે. પ્રિયાંશે ૨૦ બોલમાં ૫૭ રનની ઇનિંગ રમી પંજાબને મજબૂત સ્થિતિમાં મૂક્યું હતું. આ રોમાંચક સ્પર્ધામાં ચોથા ક્રમે હૈદરાબાદનો વિસ્ફોટક બેટ્સમેન અભિષેક શર્મા છે, જેણે ૧૧ એપ્રિલે પંજાબ કિંગ્સ સામે માત્ર ૧૮ બોલમાં પચાસ રન પૂરા કર્યા હતા. અભિષેકે પોતાની ૨૮ બોલની ઇનિંગમાં ૭૪ રન ફટકારીને સ્ટેડિયમમાં ચોગ્ગા-છગ્ગાની રમઝટ બોલાવી દીધી હતી.

યાદીના પાંચમા ક્રમે દેવદત્ત પડિકલ છે, જેણે સનરાઇઝર્સ હૈદરાબાદ સામે RCB માટે રમતા ૨૧ બોલમાં અડધી સદી ફટકારી હતી. IPL 2026માં અત્યાર સુધી જે રીતે રન બની રહ્યા છે, તે જોતા લાગે છે કે આ સીઝનમાં હજુ પણ ઘણા જૂના રેકોર્ડ્સ તૂટશે. ખાસ કરીને વૈભવ સૂર્યવંશી જે રીતે પ્રભુત્વ જમાવી રહ્યો છે, તેને જોતા ફેન્સમાં ભારે ઉત્સાહ છે. ૧૫ વર્ષની નાની ઉંમરે આવી પરિપક્વતા અને આક્રમકતા જોઈને ક્રિકેટના દિગ્ગજો પણ સ્તબ્ધ થઈ ગયા છે. હવે જોવાનું એ રહેશે કે શું આ સીઝનમાં કોઈ બેટ્સમેન ૧૫ બોલનો આ રેકોર્ડ તોડીને નવી ક્ષિતિજ સર કરી શકશે કે કેમ.