મુંબઈ : ઇન્ડિયન પ્રીમિયર લીગ (IPL) 2026 માં આજે મુંબઈના વાનખેડે સ્ટેડિયમ ખાતે રમાઈ રહેલી મુંબઈ ઈન્ડિયન્સ (MI) અને સનરાઈઝર્સ હૈદરાબાદ (SRH) વચ્ચેની મેચમાં એક ભાવુક દ્રશ્ય જોવા મળ્યું છે. મુંબઈ ઈન્ડિયન્સના તમામ ખેલાડીઓ આજે પોતાના હાથ પર કાળી પટ્ટી (Black Armbands) બાંધીને મેદાનમાં ઉતર્યા છે. આ પછવાડેનું કારણ કોઈ વિજય કે પરાજય નહીં, પરંતુ માનવતા અને સંવેદના છે. ફ્રેન્ચાઈઝીએ સત્તાવાર રીતે પુષ્ટિ કરી છે કે તેમના સપોર્ટ સ્ટાફના એક સભ્યની પુત્રીના અકાળે અવસાનને કારણે ટીમે આ નિર્ણય લીધો છે.
મુંબઈ ઈન્ડિયન્સ દ્વારા જારી કરવામાં આવેલા નિવેદનમાં જણાવાયું છે કે, "અમારા સપોર્ટ સ્ટાફની પુત્રીના દુઃખદ અવસાનને કારણે, મુંબઈ ઈન્ડિયન્સના ખેલાડીઓ આજે પરિવાર પ્રત્યે સંવેદના અને એકતા દર્શાવવા માટે કાળી પટ્ટી પહેરશે." આ ઘટનાએ રમતગમતના જગતમાં એક મોટો સંદેશ આપ્યો છે કે ટીમ માત્ર મેદાન પરના પ્રદર્શનથી જ નહીં, પણ એક પરિવારની જેમ સુખ-દુઃખમાં સાથે રહેવાથી બને છે.
મેદાન પરનો જંગ: મુંબઈએ જીત્યો ટોસ
બીજી તરફ, રમતની વાત કરીએ તો મુંબઈ ઈન્ડિયન્સના કેપ્ટન હાર્દિક પંડ્યાએ ટોસ જીતીને પ્રથમ બેટિંગ કરવાનો નિર્ણય લીધો છે. મુંબઈ માટે આ સીઝન અત્યાર સુધી ઘણી નબળી રહી છે, જ્યાં તેઓ સાતમાંથી પાંચ મેચ હારી ચૂક્યા છે. છેલ્લી મેચમાં ચેન્નાઈ સુપર કિંગ્સ સામે 103 રનથી મળેલી હાર બાદ ટીમ અત્યારે દબાણમાં છે. બીજી તરફ, પેટ કમિન્સની આગેવાની હેઠળની હૈદરાબાદની ટીમ અત્યારે ફુલ ફોર્મમાં છે અને સતત ચાર મેચ જીતીને વિજયી રથ પર સવાર છે.
બંને ટીમોની પ્લેઈંગ ઈલેવન:
મુંબઈ ઈન્ડિયન્સ: રિયાન રિકેલટન (WK), વિલ જેક્સ, નમન ધીર, સૂર્યકુમાર યાદવ, તિલક વર્મા, હાર્દિક પંડ્યા (C), રોબિન મિંઝ, ટ્રેન્ટ બોલ્ટ, જસપ્રીત બુમરાહ, એ.એમ. ગઝનફર, અશ્વિની કુમાર.
સનરાઈઝર્સ હૈદરાબાદ: અભિષેક શર્મા, ટ્રેવિસ હેડ, ઇશાન કિશન, હેનરિક ક્લાસેન, સલિલ અરોરા (WK), નીતીશ કુમાર રેડ્ડી, પેટ કમિન્સ (C), હર્ષ દુબે, સાકિબ હુસૈન, પ્રફુલ હિંગે, ઈશાન મલિંગા.
વાનખેડેનું મેદાન આજે માત્ર ચોગ્ગા-છગ્ગાનું સાક્ષી નહીં બને, પરંતુ પોતાના સાથીદારના દુઃખમાં સહભાગી થતી એક ટીમની ખેલદિલીનું પણ સાક્ષી બનશે. હૈદરાબાદની ટીમ પોતાની જીતની લય જાળવી રાખવા પ્રયત્ન કરશે, જ્યારે મુંબઈ ભાવુક ક્ષણોની વચ્ચે જીત સાથે પુનરાગમન કરવા માટે મેદાનમાં પરસેવો પાડશે.